"თეთრი ცხენით ან თეთრი ველოსიპედით თბილისში მეგობარი ქვეყნის გუბერნატორი შემოვა..."

"თეთრი ცხენით ან თეთრი ველოსიპედით თბილისში მეგობარი ქვეყნის გუბერნატორი შემოვა..." - მეჭიაური

პოლიტიკა - 10:26, 18 Jul, 2015

3052

საფინანსო-საბიუჯეტო კომიტეტის თავმჯდომარე თამაზ მეჭიაური ბოლო სამი დღის განმავლობაში ლარის კურსის გაუფასურებას გამოეხმაურა და ამ მოვლენაში კვლავ ეროვნული ბანკი დაადანაშაულა.

მეჭიაური გამოეხმაურა ეროვნული ბანკის ვიცე-პრეზიდენტის განცხადებას, ადმინისტრაციული ხარჯების არასაკმარისად შემცირებასა და არასაკმარისად გაზრდილ შემოსავლებთან დაკავშირებით. „ამ განცხადებით, აქედანვე აგუებენ მოსახლეობას, რომ მათი ბრალეულობა ამაში არაფერია და ლარი რომ გაუფასურდება მომავალში, არის მთავრობის უნიათო მუშაობისა და პარლამენტის უმრავლესობის ბრალი, რომელიც არასაკმარისად კვეცავს მმართველობით ხარჯებს“, - აღნიშნა მეჭიაურმა.

„ეს იმ პერიოდში ხდება, როცა სხვადასხვა მიზეზების გათვალისწინებით, ლარი უნდა მყარდებოდეს. კერძოდ,ბიუჯეტში შემოდინებები ხორციელდება, მათ შორის დღგ-ის გადასახადი, მაგრამ ამ ფონზე ერთდღიანი სესხები იზრდება. ორი დღის წინ 75-მილიონი გაიცა, შემდეგ 340-მილიონი, 380-მილიონი ერთკვირიანი რეფინანსირების სესხი გუშინ დაემატა. ეს იწვევს ეჭვს, რომ სურთ, დახატონ სურათი, რომ მთავრობა არის უნიათო და რომ ჩვენ მიერ მიღებული გადაწყვეტილებები, ლარის კურსის დევალვაციას იწვევს. რა თქმა უნდა, ისინი ამას ხელს შეუწყობენ. შემდეგ კი ეს ხალხი ამხედრდება და „უნიათო“ ხელისუფლების გადაყენებას მოითხოვს. დაელოდებიან ფოთთან ბორანს და ბორანიდან თეთრი ცხენით ან თეთრი ველოსიპედით, ტრიუმფით თბილისში ხალხისგან მხადაჭერილი, მეგობარი ქვეყნის გუბერნატორი შემოვა“, - განაცხადა მეჭიაურმა.