პარლამენტმა "ეროვნული ბანკის შესახებ" კანონში ცვლილებები 80 ხმით 19-ის წინააღმდეგ დაამტკიცა

პოლიტიკა - 10:19, 18 Jul, 2015

1496

პარლამენტმა მესამე მოსმენით განიხილა და 80 ხმით 19-ის წინააღმდეგ მიიღო „საქართველოს ეროვნული ბანკის შესახებ“ საქართველოს ორგანულ კანონში ცვლილების შეტანის შესახებ“ კანონპროექტი. მომხსენებელმა, საფინანსო-საბიუჯეტო კომიტეტის თავმჯდომარის პირველმა მოადგილემ, ნოდარ ებანოიძემ რედაქციული შინაარსის ის ცვლილებები წარმოადგინა, რომლებზეც ყურადღება კანონპროექტის მეორე მოსმენის დროს რიგგარეშე სხდომაზე გამახვილდა. კანონის პროექტით, საფინანსო სექტორის საქმიანობაზე სახელმწიფო ზედამხედველობის მიზნით, ეროვნულ ბანკთან იქმნება სსიპ საქართველოს საფინანსო ზედამხედველობის სააგენტო. სააგენტოს საქმიანობას ხელმძღვანელობს სააგენტოს საბჭო, განისაზღვრება აღნიშნული საბჭოს ფუნქციები, ფორმირებისა და საქმიანობის წესი. წარმოდგენილი ცვლილების მიხედვით, კომერციული ბანკების ლიცენზირებას განახორციელებს საფინანსო ზედამხედველობის სააგენტო. ებანოიძის განმარტებით, კანონის მთელ რიგ მუხლებში ეროვნული ბანკის ნაცვლად განისაზღვრება სააგენტოს ფუნქციები საფინანსო სექტორის საქმიანობაზე ზედამხედველობის ნაწილში.

განხილვის პროცესში პროექტით გათვალისწინებული რამდენიმე საკითხი შეიცვალა. მათ შორის ცვლილებები შეეხო სააგენტოს საბჭოს დაკომპლექტების წესს და მისი ხელმძღვანელის არჩევის საკითხს. ასევე სააგენტოში შიდა აუდიტორული სამსახურის შექმნა გადაწყდა.

საფინანსო-საბიუჯეტო კომიტეტის თავმჯდომარის და მისი პირველი მოადგილის თამაზ მეჭიაურის და ნოდარ ებანოიძის ავტორობით მომზადებული საკანონმდებლო ინიციატივა როგორც პარლამენტში, ასევე საბანკო სექტორის და საერთაშორისო ორგანიზაციების მხრიდან კრიტიკის თემად იქცა.

პრეზიდენტი საკანონმდებლო პაკეტზე ვეტოს გამოყენებას აპირებს.