მთვრალი რუსი "პრაპორშიკები" ავტომაგისტრალზე- დიმიტრი შაშკინი მომავალ საფრთხეებზე საუბრობს

პოლიტიკა - 17:39, 17 Jul, 2015

3461

საქართველოს თავდაცვის ყოფილი მინისტრი დიმიტრი შაშკინი საოკუპაციო ხაზის მიმდებარედ განვითარებულ მოვლენებს ხელისუფლების მიერ გატარებულარასწორ პოლიტიკას უკავშირებს. როგორც დიმიტრი შაშკინმა „ნიუპოსტთან“ საუბარში აღნიშნა. მოქმედმა ხელისუფლებამ 2012 წელს აღნიშნული ტერიტორიიდან სპეცდანიშნულების ძალები გამოიყვანა და ამით ცხინვალის მარიონეტულ ხელისუფლებას და რუს სამხედროებს საშუალება მისცა პროვოკაციული ქმედებები უფრო ადვილად განეხორციელებინათ.

„იქ არსებული სიტუაცია არის შედეგი, რომელსაც ჩვენი ხელისუფლება ახორციელებს ბოლო სამი წლის განმავლობაში. როდესაც გაქვს არჩევანი ბრძოლასა და უღირსობას შორის და აირჩევ უღირსობას ყოველთვის მიიღებ ომს, ეს ჩემზე ბევრად ბრძენმა ხალხმა თქვა. სამწუხაროდ ჩვენმა ხელისუფლებამ უღირსობა აირჩია და ახლა ჩვენ ვიღებთ ამ პოლიტიკის შედეგებს.

2012 წლამდე იქ იყო განლაგებული შსს-ს სპეცდანიშნულების ძალები და ეს იყო ერთგვარი პრევენცია ასეთი ნაბიჯებისგან. ეს ახლა რაც ხდება ბანერების დამონტაჟებით, ეს არის მარიონეტული ხელისუფლების და რუსი სამხედროების, იგივე ტერორისტების პროვოკაცია. მე ჩვენი ხელისუფლების ლოგიკა არ მესმის, მაგრამ ალბათ ჩვენმა ხელისუფლებამ სპეცდანიშნულების ძალები გამოიყვანა იმის გამო, რომ თითქოს ეს ნაბიჯი იქნებოდა რუსეთის მიერ აღქმული როგორც კეთილი ჟესტი. ჩვენ ზუსტად იმ მოსავალს ვიღებთ, რაც ჩვენმა ხელისუფლებამ 2012 წელს დათესა.“- განაცხადა შაშკინმა.

შაშკინის თქმით აუცილებელია რომ ამ პროცესებზე დაუყოვნებლივი რეაგირება დაიწყოს, ერთერთ ნაბიჯად კი შაშკინი პაატა ზაქარეიშვილის თანამდებობიდან გადაყენებას მიიჩნევს.

„საფრთხე ახლა ბევრად უკვე გაზრდილია, ჩერჩილმა თქვა, რომ რუსეთი მხოლოდ ძალას სცემს პატივს, მან ასევე თქვა, რომ რუსეთთან მიღწეული შეთანხმების ფასი იგივეა, რაც იმ ქაღალდის ფასი, რომელზეც ეს შეთანხმებაა დაწერილი. ახლა მთავარი პრობლემა არის ის, რომ ჩვენი უუნარო პოლიტიკის გამო ბოროტების იმპერიის გარდა ახლა უკვე მივიღეთ ცხინვალის გათამამებული მარიონეტული რეჟიმი და რუსი „პრაპორშიკებიც“. მე ვამბობდი რომ ჩვენი მხრიდან დათმობები, ცხინვალის რეჟიმის მიერ აღქმული იქნებოდა, როგორც ჩვენი სისუსტე. თუ ადრე ჩვენ რუსეთის იმპერიას ვებრძოდით, ახლა დაემატა მთვრალ რუსი პრაპორშიკებთან და მათ მარიონეტებთან ბრძოლაც.

ამ საკითხის მოსაგვარებლად საჭიროა პოლიტიკას მოშორდეს მოღალატე სახელმწიფო მინისტრი, რომელიც გაუგებარია ვის ინტერესებს იცავს, ვგულისხმობ ზაქარეიშვილს და ამ პროცესებზე რეაგირება უნდა დაიწყოს დაუყოვნებლივ. წინააღმდეგ შემთხვევაში ჩვენ მთვრალ რუს "პრაპორშიკებს" გორი-თბილისის ავტომაგისტრალზეც ვნახავთ.

აგვიხსნას ხელისუფლებამ რას ნიშნავს მათ მიერ გაცხადებული რუსეთთან ურთიერთობის დალაგება. ამაში იგულისხმება მწვანილის გატანა და მოსკოვში ტაშფანდური? „- აცხადებს შაშკინი.