რატომ არ მოხდა გამყოფი ხაზის მიმდებარედ დარჩენილი ქართული მიწების დარეგისტრირება?

სოც.მედია - 15:13, 17 Jul, 2015

1254

,,დემოკრატიული მოძრაობის ეროვნული ცენტრის“ ხელმძღვანელი მუხრან ბურჭულაძე საოკუპაციო ხაზის გადმოწევის ფაქტს სოციალურ ქსელში ეხმაურება. მისი თქმით, მთავრობას უნდა აღერიცხა საოკუპაციო ზოლის მიმდებარედ დარჩენილი სახნავ-სათესი და საკარმიდამო მიწებ და უნდა მომხდარიყო მათი დარეგისტრირება, რათა ოკუპანტის მიერ ქონების მიტაცებით გამოწვეული ზიანის დათვლა შესაძლებელი ყოფილიყო. მუხრან ბურჭულაძე მიიჩნევს, რომ ხელისუფლება სახელმწიფო ინტერესების წინააღმდეგ მოქმედებს.

,,გახსოვთ მთავრობას მოვუწოდებდი აღერიცხა დევნილი მოსახლეობის ქონება ოკუპირებულ ტერიტორიაზე, ხოლო სახნავ-სათესი თუ საკარმიდამო მიწის ნაკვეთები, რომლებიც გამყოფი ხაზის მიმდებარედაა დარჩენილი სასწრაფო წესით უნდა დაერეგისტრირებინა. ეს მოგვცემდა ოკუპანტის მიერ ქონების მიტაცებით გამოწვეული კონკრეტული ზიანის დათვლის საშუალებას, რაც გააადვილებდა დაზარალებული მოქალაქეებისთვის საკომპენსაციო თანხის გამოთვლას.

ის მატერიალური ზიანი, რომელიც ჩვენს მოქალაქეებს მიადგათ უნდა აანაზღაუროს ოკუპაციის განმახორციელებელმა მხარემ. ვეჭვობ, რომ მთავრობა მხოლოდ რუსეთის "არგაღიზიანების" პრინციპით მოქმედებდეს, რადგან გახსოვთ ჩემს მოწოდებას, საქართველოს იუსტიციის მინისტრის მხრიდან მოჰყვა განცხადება, რომ თითქოს "62 ერთეული მიწის ნაკვეთი დარეგისტრირდა", რაც აღმოჩნდა, რომ არ შეესაბამება სიმართლეს.

ხელისუფლებამ კიდევ ერთი კითხვა გააჩინა - არის თუ არა მისი უმოქმედობა განპირობებული იმით, რომ ისინი წინასწარ ფლობდნენ ინფორმაციას რუსეთის სამომავლო გეგმებზე, რაც ახალი ტერიტორიების მითვისებას გულისხმობს.

ასე კი გაცილებით მძიმე სურათი გვაქვს სახეზე - ხელისუფლება სახელმწიფო ინტერესების წინააღმდეგ ოკუპანტთან თანამშრომლობს.

წინ არის შემდეგი სახის საფრთხეები;

1. ოკუპაცია გრძელდება და ამას ვეგუებით;

2. მდგომარეობა მწვავდება და მივდივართ სამხედრო კონფლიქტამდე;

3. მთავრობა მიდის განსაკუთრებით მძიმე დათბობებზე და ვთანხმდებით შეზღუდული სუვერენიტეტის სტატუსს - რუსეთის მიერ დადგენილ "ახალ რეალობას", რაც ქართული სახელმწიფოს არარსებობას ნიშნავს.

თუ ზემოხსენებულ კითხვას პასუხი და არა მხოლოდ განცხადებით, არამედ კონკრეტული ნაბიჯებით არ გაეცა, გვრჩება ერთადერთი გზა - დაუყოვნებლივ შევცვალოთ რეჟიმი და დავითხოვოთ არალეგიტიმური ხელისუფლება“ - წერს მუხრან ბურჭულაძე.