გორის რაიონის სოფელ წითელუბანსა და ოკუპირებული ახალგორის რაიონის სოფელ ორჭოსანის მიმდებარე ტერიტორიაზე რუსი მესაზღვრეების მიერ საოკუპაციო ხაზის გადმოწევის ფაქტს გაეროს გენერალური მდივანი ბან კი-მუნი გამოეხმაურა.

ბან კი-მუნმა ყველა მხარეს მოუწოდა თავი შეიკავონ ისეთი ნაბიჯებისგან, რაც შეიძლება, პროვოკავიულად იყოს აღქმული.

"გაეროს გენერალური მდივანი გამოხატავს შეშფოთებას იმ ქმედებების გამო, რამაც შესაძლოა, ნეგატიური ეფექტი იქონიოს ადგილობრივი მოსახლეობის თავისუფალ გადაადგილებასა და საცხოვრებელ პირობებზე. ის ყველა მხარეს მოუწოდებს, თავი შეიკავონ ისეთი ნაბიჯებისგან, რაც შეიძლება, იყოს აღქმული პროვოკაციულად და რეგიონში მშვიდობასა და სტაბილურობას ხელს არ შეუწყობს.

გენერალური მდივანი მოუწოდებს ყველა მხარეს, გამოიყენონ არსებული მექანიზმები, როგორიცაა ჟენევის საერთაშორისო მოლაპარაკებები და ინციდენტების პრევენციისა და მათზე რეაგირების მექანიზმი, რათა შეამცირონ დაძაბულობა", - ნათქვამია განცხადებაში.

რუსეთის საოკუპაციო ძალებმა ე.წ. საზღვრის აღმნიშვნელი ბანერები 10 ივლისს გადმოსწიეს. საოკუპაციო ხაზს მიღმა ბაქო-სუფსის მილსადენის დაახლოებით 1600-მეტრიანი მონაკვეთი და ადგილობრივი მოსახლეობის მიწები მოექცა.