"ემოციები ამ საკითხში არ გამოგვადგება"- ბერუჩაშვილი საოკუპაციო ხაზზე მიმდინარე პროცესებს ეხმაურება

პოლიტიკა - 09:55, 17 Jul, 2015

1129

საქართველოს საგარეო უწყების ხელმძღვანელის თამარ ბერუჩაშვილის თქმით საოკუპაციო ხაზზე მიმდინარე პროცესებთან დაკავშირებით საერთაშორისო საზოგადოებასთან პირველივე დღიდან აქტიური მუშაობა მიმდინარეობს. ბერუჩაშვილის განცხადებით საგარეო საქმეთა სამინისტრო საქმის კურსშია ყველა იმ განცხადებასთან დაკავშირებით, რომელიც საოკუპაციო რეჟიმის მხრიდან გაკეთდა. საგარეო საქმეთა მინისტრი არ ეთანხმება ე.წ სამხრეთ ოსეთის ხელისუფლების განცხადებას იმის შესახებ, რომ ბანერების დადგმა მათი სუვერენული გადაწყვეტილება იყო და რუსეთი ამ პროცესებთან კავშირში არაა.

"მინდა ხაზი გავუსვა, რომ რუსეთის მხარეს ეკითხება ყველა ის ნაბიჯი, რომელიც გადადგმულია ოკუპირებულ ტერიტორიაზე და შესაბამისად, ამ განცხადებებს არ აქვს არანაირი საფუძველი", - განაცხადა ბერუჩაშვილმა.

ბერუჩაშვილის განცხადებით ხელისუფლებამ და საზოგადოებამ ყველაფერი უნდა გააკეთოს იმისთვის, რომ თავიდან იქნას აცილებული ნებისმიერი ტიპის პროვოკაცია:

„მნიშვნელოვანია გავაკეთოთ ყველაფერი, რათა თავიდან იქნას აცილებული ნებისმიერი ტიპის პროვოკაცია, რომელიც კიდევ უფრო გაართულებს მდგომარეობას ადგილზე. ჩვენთვის მიუღებელია ნებისმიერი ბანერი იმ შინაარსის, რომელიც დგას საქართველოს ოკუპირებულ ტერიტორიაზე, ამიტომ ძალზედ მნიშვნელოვანია კარგად ვიცოდეთ, ემოციები ამ საკითხში არ გამოგვადგება. ეს არის რთული, ხანგრძლივი პროცესი. მას არ აქვს გადაწყვეტის უნივერსალური რეცეპტი, მაგრამ ძალიან დიდია იმის ალბათობა, რომ არასწორი ნაბიჯის გადადმის შემთხვევაში ჩვენ გამოვიწვიოთ პროვოკაცია. ეს იქნება დესტაბილიზაციის მომტანი ქვეყნისთვის, რაც ნამდვილად არ სჭირდება საქართველოს", - განაცხადა ბერუჩაშვილმა.