რა უნდა გაეკეთებინა სახელმწიფოს, ცეცხლი უნდა გაეხსნა? ხომ ვნახეთ რა მოჰყვა ამას 2008 წელს?- თალაკვაძე

პოლიტიკა - 20:47, 16 Jul, 2015

1776

შს მინისტრის მოადგილე არჩილ თალაკვაძე, ე.წ საზღვართან ოკუპანტების მიერ საქართველოს დროშის ჩამოხსნის ფაქტს გამოეხმაურა და აღნიშნა, რომ ამ სიტუაციაში სახელმწიფოს ქმედება ადეკვატურია და მთავრობა ცდილობს სიტუაცია აკონტროლოს და პროვოკაციას არ აყვეს. თალაკვაძის თქმით, ის დარწმუნებულია, რომ მოწინააღმდეგეს ქართული დროშის დაბრუნება და ბანერების უკან წაღება აუცილებლად მოუწევს

„ჩვენ ამ ვითარებას ადეკვატურად ვაფასებთ, სიტუაცია კონტროლირებადია , ჩაინიშნა ორშაბათს რიგგარეშე სხდომა ინციდენტების პრევენციის ფორმატში, რომელზეც ამ საკითხების განხილვა ძალიან პრინციპულად მოხდება. ასევე ადგილზე არის სპეცდანიშნულების რაზმი და შიდა ქართლის სამხარეო პოლიცია და ისინი იცავენ ადგილზე მოსახლეობის უსაფრთხოებას. მე დარწმუნებული ვარ რომ ამ და სხვა ქართული დროშის დაბრუნება და ბანერების უკან წაღება აუცილებლად მოუწევს ჩვენს მოწინააღმდეგს. რაც შეეხება დროშის ჩამოხსნის ფაქტს, რა უნდა გაეკეთებინა სახელმწიფოს ასეთ შემთხვევაში იმის გარდა, რასაც ვაკეთებთ, ცეცხლი უნდა გაეხსნა ამ ადამიანების მისამართით? თუ საბრძოლო მოქმედებები დაეწყო? ჩვენ ხომ უკვე ვნახეთ რა მოჰყვა ამას 2008 წელს? ამ გზაზე ჩვენ ისევ არ წავალთ, ეს მწარე გაკვეთილი გვახსოვს.

ჩვენი ხელისუფლება მსგავს ინციდენტებს უპირისპირდება იმ მეთოდებით, რომელიც არის აპრობირებული და მხარდაჭერილი საერთაშორისო თანამეგობრობის მიერ. ეს არის პირველ რიგსი დიპლომატია, ეს არის ეკონომიკური განვიტარების პროექტები და მოსახლეობის გაძლიერება ადგილზე, ეს არის საერტაშორისო თანამეგობრობის მეტი მობილიზაცია და რათქმა უნდა ჩვენი ადგილის მოპოვება ნატოსა და ევროკავშირში“- განაცხადა არჩილ ტალაკვაძემ „ქრონიკის“ ეთერში.