ე.წ სამხრეთ ოსეთი მზადაა, თანხის სანაცვლოდ ნავთობსადენის უსაფრთხოება უზრუნველყოს

პოლიტიკა - 17:01, 16 Jul, 2015

6193

ე.წ სამხრეთ ოსეთის რესპუბლიკა მზად არის უზრუნველყოს მის ტერიტორიაზე გამავალი ბაქო-სუფსის ნავთობსადენის უსაფრთხოება, იმ პირობით თუ British Petroleum-ი სატრანზიტო და მომსახურების საფასურს გადაიხდის. ამის შესახებ ოსურ მედიას სამხრეთ ოსეთის დე ფაქტო პარლამენტის ვიცე სპიკერმა დმიტრი ტასოევმა განუცხადა.

ტასოევის თქმით, იმის გაცხადებით, რომ სამხრეთ ოსეთის ტერიტორიაზე არსებული ნავთობსადენი საფრთხის ქვეშაა, საქართველომ ფაქტიურად აღიარა სამხრეთ ოსეთის დამოუკიდებლობა.

„მინდა მადლობა გადავუხადო საქართველოს საგარეო საქმეთა სამინისტრო იმისთვის რომ ამ განცხადებით მათ ფაქტიურად აღიარეს სამხრეთ ოსეთის დამოუკიდებლობა, თუ თბილისი ამას დე იურედაც გააკეთებს, შეგვეძლება რომ ერთობლივად მოვახდინოთ საზღვრის დემარკაცია და ჩვენი სახელმწიფოების საზღვრის ხაზის დელიმიტაცია“- განაცხადა დე ფაქტო ვიცე სპიკერმა.

მან ასევე აღნიშნა, რომ სამხრეთ ოსეთის მხარეს შეუძლია ნავთობსადენის უსაფრთხოების და მომსახურების თავისთავზე აღება, იმ პირობით თუ British Petroleum ხელშეკრულებას „გაზპრომ- სამხრეთ ოსეთთან“ გააფორმებს.

„მილსადენი მხოლოდ ახლა არ გაჩენილა ჩვენს ტერიტორიაზე, მილსადენთან დაკავშირებით აქამდე არავითარ ინციდენტს არ ქონია ადგილი. თუმცა ასეთ შემთხვევებში მიღებულია, რომ მმართველმა კომპანიამ თავისი ობიექტის დაცვისთვის და მომსახურებისთვის თანხა გადაიხადოს“- განაცხადა ტასოევმა.

ე. წ სამხრეთ ოსეთის ტერიტორიაზე გადის ბაქო-სუფსის ნავთობსადენის ორი მონაკვეთი, რომლის საერთო სიგრძე 1.6 კმ-ია. ნავთობსადენის საკითხი აქტუალური მას შემდეგ გახდა, რაც ე.წ სამხრეთ ოსეთის საოკუპაციო რეჟიმმა ნავთობსადენის მიმდებარედ ე.წ საზღვრის აღმნიშვნელი ბანერები დააყენა.