ანნ ბრასორი საქართველოში ადმინისტრაციული საზღვრის შეცვლის გამო შეშფოთებას გამოთქვამს

პოლიტიკა - 14:56, 16 Jul, 2015

1083

ევროპის საბჭოს საპარლამენტო ასამბლეის პრეზიდენტმა ანნ ბრასორმა, რუსეთის შეიარაღებული ძალების მხრიდან საქართველოს სეპარატისტული რეგიონის ბორდერიზაციის პროცესს შემაშფოთებელი უწოდა. ბრასორის თქმით განსაკუთრებით საგანგაშოა ის ფაქტი, რომ ეს ქმედებები ბაქო-სუფსის მილსადენის სიახლოვეს ხორციელდება.

„შევიტყვე უაღრესად შემაშფოთებელი ინფორმაცია საქართველოს სეპარატისტული რეგიონის - სამხრეთ ოსეთის ადმინისტრაციული საზღვრის ცალმხრივად შეცვლისა და იქ უწყვეტად მიმდინარე ბორდერიზაციის პროცესის შესახებ, რომელსაც რუსეთის შეიარაღებული ძალები ახორციელებენ. განსაკუთრებით საგანგაშოა ის გარემოება, რომ ეს ქმედებები ხორციელდება ბაქო-სუფსის მილსადენის სიახლოვეს, რომელსაც გადამწყვეტი ეკონომიკური მნიშვნელობა აქვს რეგიონისთვის.

ასამბლეა თანმიმდევრულად გამოხატავდა თავის მხარდაჭერას საქართველოს ტერიტორიული მთლიანობის მიმართ. კიდევ ერთხელ მინდა დავაფიქსირო ჩვენი პოზიცია: ადმინისტრაციული საზღვრის ბორდერიზაცია ეწინააღმდეგება საერთაშორისო სამართალს და მხოლოდ დაძაბულობის გამწვავების მიზანს ემსახურება. საზღვრის ორივე მხარეს მცხოვრები ადამიანების გაერთიანების ნაცვლად, ამგვარი ქმედებები კიდევ უფრო აცალკევებს მათ ერთმანეთისგან, რასაც მკაცრად ვგმობ, ისევე როგორც დავგმე ამგვარი ქმედებები გასული წლის მაისში, ადმინისტრაციული საზღვრის მონახულებისას." - განაცხადა ევროპის საბჭოს საპარლამენტო ასამბლეის პრეზიდენტმა ანნ ბრასორმა.