ბიძინა ივანიშვილის დამსახურებაა, რომ რუსეთთან სწორი პოლიტიკის წარმოება დავიწყეთ

ბიძინა ივანიშვილის დამსახურებაა, რომ რუსეთთან სწორი პოლიტიკის წარმოება დავიწყეთ - პრემიერი

პოლიტიკა - 14:21, 16 Jul, 2015

1233

საქართველოს პრემიერ მინისტრი ირაკლი ღარიბაშვილი საოკუპაციო ხაზთან განვითარებულ მოვლენებს გამოეხმაურა. პრემიერმა ე.წ საზღვრის მიმდებარე ტერიტორიაზე განვითარებულ მოვლენებს პროვოკაცია უწოდა და აღნიშნა, რომ ხელისუფლების მიზანი ამ პრობლემის მოგვარებაა, თუმცა მთავრობა ამასთან დაკავშირებით ხმაურიან პოლიტიკას არ ატარებს:

„მე მოვუწოდებ პოლიტიკოსებს მეტი პასუხისმგებლობით მიუდგნენ ასეთ საკითხებს, ვინაიდან ჩვენ ყველაფერი უნდა გავაკეთოთ იმისთვის, რომ ქვეყანაში სტაბილურობა შევინარჩუნოთ და არც ერთ ძალას არ უნდა მივცეთ საშუალება, რომ რაიმე პროვოკაციული გზით მოახდინონ რეგიონში სიტუაციის დაძაბვა“ - აღნიშნა პრემიერმა.

ღარიბაშვილის თქმით, საოკუპაციო ხაზთან განვითარებული მოვლენები სააკაშვილის პოლიტიკის და 2008 წლის ომის შედეგია:

„ეს არის კიდევ ერთხელ შედეგი იმ გაუაზრებელი პოლიტიკის, რომელიც სააკაშვილმა წლების განმავლობაში აწარმოა, ეს არის შედეგი 2008 წლის ომისა, რომელმაც მოგვიტანა 25 ათასამდე ახალი დევნილი, 100-ზე მეტი დაკარგული სოფელი და დამატებით დაკარგული ტერიტორიები. ეს არის მძიმე მემკვიდრეობა, რომელსაც ჩვენ ვიმკით და ვუმკლავდებით აგერ უკვე მესამე წელია“- განაცხადა ღარიბაშვილმა.

ირაკლი ღარიბაშვილის შეფასებით მთავრობა რუსეთთან მიმართებაში კონსტრუქციულ პოლიტიკას ატარებს. პრემიერმა ამ საკითხში ყოფილი პრემიერის ბიძინა ივანიშვილის დამსახურებასაც გაუსვა ხაზი:

„სწორედ ჩვენი მთავრობის, ბატონი ბიძინა ივანიშვილის დამსახურებაა ის, რომ რუსეთთან სწორი კონსტრუქციული პოლიტიკის წარმოება დავიწყეთ და მაქსიმალურად ხელი შევუწყეთ სიტუაციის დეესკალაციას, რითაც ჩვენი ქვეყნის და ჩვენი რეგიონის სტაბილურობას შევუწყეთ ხელი. მე მინდა ხაზგასმით ავღნიშნო ჩვენი მთავრობის კონსტრუქციული პოლიტიკა რუსეთთან მიმართებაში, კარგად გვახსოვს, როგორ კონსტრუქციულად და სწორად მოვიქეცით მაშინ, როცა სოჭის ოლიმპიადა გაიმართა, მაშინ ჩვენ უსაფრთხოების საკითხებშიც ვიყავით ჩართული ამერიკელებთან, ევროპელებთან და რუსებთან ერთად. მაქსიმალურად ფრთხილ დაკონსტრუქციულ პოლიტიკას ვაწარმოებთ, მაგრამ ჩვენ არასოდეს არ შევეგუებით ჩვენი ქვეყნის ტერიტორიების ოკუპაციას და ამ საკითხებში არაფრის ფასად არ ვაპირებთ კომპრომისზე წასვლას“- განაცხადა ირაკლი ღარიბაშვილმა.