თბილისის ვიცე-მერმა დიმიტრი ქუმსიშვილმა 13-14 ივნისს მომხდარი სტიქიით მიყენებული ზიანის სალიკვიდაციო სამუშაოების შესახებ ანგარიში წარადგინა.

დიმიტრი ქუმსიშვილის განცხადებით, 5 ივლისს დედაქალაქის საკრებულოს მიერ დამტკიცებული წესის ამოქმედების შედეგად, განაცხადი უკვე მიღებულია სტიქიით დაზარალებული 7 ოჯახისგან. სულ 37 ადამიანისთვის სპეციალურად გაიხსნა საგარანტიო ანგარიშები, სადაც მათთვის განკუთვნილი 1.657.453 ლარი უახლოესი დღეების განმავლობაში აისახება.

„მინდა აღვნიშნო, რომ დღეის მდგომარეობით დაზარალებული ოჯახების საცხოვრებლით უზრუნველყოფისათვის, განსახლებისა და სახლების რეაბილიტაციისათვის საჭირო თანხა 18 მლნ. ლარს შეადგენს, საიდანაც ხელმისაწვდომია 10 მილიონი ლარი. აქ გასაკუთრებული მადლობა მინდა გადავუხადო საერთაშორისო საქველმოქმედო „ფონდ ქართუს“ და მის დამფუძნებელს იმისთვის, რომ წესით აღებული ვალდებულებების შესასრულებლად ჩარიცხავს 8 მილიონ ლარს“, - განაცხადა დიმიტრი ქუმსიშვილმა.

ვიცე-მერმა თბილისის ბიუჯეტში ამ დროისთვის არსებული და უკვე გადანაწილებული თანხების შესახებ ისაუბრა. დიმიტრი ქუმსიშვილის განცხადებით, ინფრასტრუქტურული პროექტებისა და აღდგენითი სამუშაოებისთვის დედაქალაქის ბიუჯეტში 15.959.000 ლარია გადანაწილებული. აღნიშნული თანხიდან 12.007.000 მობილიზებულია ცენტრალური ბიუეტიდან, 2.441.000 ლარი მერიამ შიდა რესურსის გადანაწილებით მიიღო, ხოლო კერძო სექტორიდან მობილიზებული 1.511.000 ლარითა და სხვა საბიუჯეტო რესურსებით გამგეობები დაზარალებული მოსახლეობის საცხოვრებელი სახლებისა და ეზოების შეკეთებას უზრუნველყოფენ.

ამასთან, ვიცე-მერმა მადლობა გადაუხადა ყველა ადამიანს ვინც შემოწირულობა გაიღო და თუნდაც 1 ლარი გადარიცხა სტიქიის შედეგად დაზარალებული მოსახლეობის დასახმარებლად. ასევე, ყველა კერძო კომპანიას, რომლებმაც დიდი ოდენობით შემოწირულობა განახორციელეს.

„სწორედ თითოეული თქვენგანის დახმარებით ხდება შესაძლებელი დაზარალებული 50-მდე ოჯახის მუდმივი საცხოვრისით უზრუნველყოფა,-განაცხადა დიმიტრი ქუმსიშვილმა.