"საპროტესტო აქციაში მონაწილეობა არის ჟურნალისტების უფლება და მათი რისკი"

"საპროტესტო აქციაში მონაწილეობა არის ჟურნალისტების უფლება და მათი რისკი" - თამარ კორძაია

პოლიტიკა - 13:55, 16 Jul, 2015

1240

უმრავლესობის დეპუტატის თამარ კორძაიას შეფასებით, ორჭოსანში ჟურნალისტების მიერ ოკუპაციის წინააღმდეგ აქციის გამართვა, მათი უფლება იყო და ამას მედიის წარმომადგენლებს კანონი არ უკრძალავს. როგორც კორძაიამ „ნიუპოსტთან“ საუბარში აღნიშნა, მსგავსი პროტესტის დროს გათვალისწინებული უნდა იყოს, ის რისკებიც, რათა ამ ქმედებამ უფრო მავნე ზიანი არ მოიტანოს:

„მე ნამდვილად არ ვიცი, ვინ იყვნენ ეს ადამიანები, მაგრამ ინფორმაცია გავრცელდა, რომ ბანერი ჟურნალისტებმა წააქციეს. ჟურნალისტებსაც აქვთ თავისი გამოხატვის თავისუფლება. თუ ჟურნალისტები იყვნენ რეპორტაჟის გასაკეთებლად ჩასული და მერე წააქციეს, ეს ბოლომდე თავსებადი არ იქნებოდა მათ პროფესიონალიზმთან. თუ ჟურნალისტები აქციის ჩასატარებლად იყვნენ ჩასული, ეს ცალკე თემაა. ამ საკითხის განხილვისას სწორედ ეს დეტალები უნდა იყოს გათვალისწინებული. აღნიშნულ აქციაში მონაწილეობა არის ჟურნალისტების უფლება და მათი რისკი, თუ როგორ შეფასდება საზოგადოების მხრიდან მათი საქმიანობა, მაგრამ ამ გამოხატვის თავისუფლებას ჟურნალისტებს კანონი არ უკრძალავს. შესაბამისად, თუ ამას არც ის მედიაორგანიზაციები არ უკრძალავენ, რომელშიც მუშაობენ, ჩვენ მითუმეტეს ჟურნალისტების საქმიანობასთან არანაირი შეხება არ გვაქვს. რაც შეეხება თვითონ ფაქტს, მე ვფიქრობ რომ თითოეული მოქალაქე მეტი პასუხისმგებლობით უნდა ეკიდებოდეს ამ საკითხს. ჩვენ რა თქმა უნდა პროტესტი უნდა გამოვხატოთ რუსეთის მიმართ, ორი აზრი არ არსებობს, რომ რუსეთი არის ოკუპანტი და ყველა ხელისუფლება, მათ შორის დღევანდელიც, რუსეთის აგრესიის წინააღმდეგ უნდა დგამდეს ქმედით ნაბიჯებს, ეს ცალსახაა, ყველა მოქალაქე უნდა აპროტესტებდეს საკუთარი სახელმწიფოს მიმართ გამოხატულ აგრესიას, მაგრამ თითოეული ჩვენგანის პროტესტმა და მოქმედებამ, უფრო მავნე ზიანი არ უნდა მოიტანოს. ჟურნალისტების ამ ქმედებას საბედნიეროდ უარყოფითი შედეგი არ ქონია.“- განაცხადა თამარ კორძაიამ.