"მე ჟურნალისტიკა მესმის მიუკერძოებელი" - კობახიძე ჟურნალისტების აქციას უარყოფითად აფასებს

პოლიტიკა - 11:53, 16 Jul, 2015

1918

უმრავლესობის წევრი მანანა კობახიძე საოკუპაციო ხაზთან ჟურნალისტების აქციას ეხმაურება და ამბობს, რომ ეს "გარკვეული პოლიტიკური ჯგუფის" მიერ იყო ანგაჟირებული.

მისი თქმით, ეს აქცია ერთ-ერთი პოლიტიკური ჯგუფის დღის წესრიგში შედიოდა.

„მე ჟურნალისტიკა მესმის მიუკერძოებელი, დამოუკიდებელი და არა რომელიმე პარტიული ჯგუფის ინტერესების განმახორციელებელი. სამწუხაროდ, მე ვფიქრობ, რომ ეს პოლიტიკური ჯგუფის დღის წესრიგში შედიოდა. რა თქმა უნდა, აზრის გამოხატვა ყველას კონსტიტუციური უფლებაა და კანონის შესაბამისია, მაგრამ როდესაც ამ ყველაფრის უკან, სავარაუდოდ, იკვეთება და ფაქტი, რომ ფიქსირდებოდნენ სწორედ პოლიტიკური პარტიის ლიდერები, ცხადია და აშკარაა. მე არ ვამბობ, რომ ისინი არ არიან პატრიოტები და არ უყვართ თავისი სამშობლო, მაგრამ მიმაჩნია, რომ ეს გარკვეული პოლიტიკური ძალის მიერ იყო ანგაჟირებული. სამწუხაროდ, არიან მედია საშუალებები და ჟურნალისტები, რომლებიც დაკვეთას პირდაპირ ასრულებენ და ეს რეალობაა“ - განაცხადა კობახიძემ.

შეგახსენებთ, 2 დღის წინ მედიის წარმომადგენლებმა ორჭოსანში საოკუპაციო ხაზის გადმოწევა მშვიდობიანი აქციით გააპროტესტეს. მათ ე.წ. საზღვრის აღმნიშვნელი ბანერი ჩამოხსნეს და ხევში გადააგდეს.