პრაღაში აბაშიძე-კარასინის 4-საათიანი მოლაპარაკება დასრულდა. მთავარი თემა, რომელიც პრემიერის სპეციალურმა წარმომადგენელმა შეხვედრაზე დააყენა, წითელუბანთან და ორჭოსანთან საოკუპაციო საზღვრის გადმოწევაა.

როგორც შეხვედრის დასრულების შემდეგ გრიგორი კარასინმა განაცხადა, ეს იყო საქმიანი და კონკრეტული საუბარი, სადაც განიხილეს ჰუმანიტარული, სავაჭრო და სავიზო პოლიტიკა.

რაც შეეხება საოკუპაციო ხაზის გადმოწევას, კარასინის თქმით, ეს იყო ემოციური კამპანია და ემოციურმა აფეთქებამ ურთიერთობების ნორმალიზებას ხელი არ უნდა შეუშალოს.

„ჩვენ დაინტერესებული ვართ, რომ ორმხრივი ურთიერთობების პროცესი განვითარდეს ნორმალური რიტმით და არ იყოს უხეში დახევა უკან, განვითარდეს თანამშრომლობისა და ურთიერთგაგების ატმოსფერო პოლიტიკური ინტრიგების ფონზე, რომელიც დროდადრო გვახსენებს თავს. ამის სურვილი არის. ნახეთ, რომ შეხვედრებში სატრანსპორტო უწყებების წარმომადგენლები ჩავრთეთ. მე ვფიქრობ, რომ მათ კონსტრუქციული განწყობა ნახეს. ამ პრაქტიკას გავაგრძელებთ“, - განაცხადა კარასინმა.