ვინც სასაზღვრო ბანერი ამოიღო, ის უნდა იპოვონ და დასაჯონ

ვინც სასაზღვრო ბანერი ამოიღო, ის უნდა იპოვონ და დასაჯონ - კარასინი

პოლიტიკა - 15:07, 15 Jul, 2015

4471

რუსეთის საგარეო საქმეთა მინისტრის მოადგილე - გრიგორი კარასინი მიიჩნევს, რომ თბილისში გარკვეული პროვოკაციული ძალები მოქმედებენ, რომლებსაც რუსეთთან ურთიერთობის ნორმალიზება არ სურთ.

ამის შესახებ კარასინმა პრაღაში ზურაბ აბაშიძესთან შეხვედრის დაწყებამდე განაცხადა.

მისი თქმით, ის რაც ბოლო დღეებში მოხდა, არის ურთიერთობის ნორმალიზების წინააღმდეგ მიმართული პროვოკაცია.

„ყველა სასაზღვრო ნიშნები, რომლებიც ადგილზე 8 აპრლამდე იყო, აღადგინეს, მაგრამ ეს აბრები ისევ ჩამოხსნეს. შესაბამისად თბილისში მოქმედებენ ძალები, რომლებსაც კატეგორიულად არ სურთ ურთიერთობების ნორმალიზება რუსეთის ფედერაციასთან, სამხრეთ ოსეთთან და აფხაზეთთან. ამ მიზნით ყველა შესაძლებლობას იყენებენ. საზღვრის გადაწევას ადგილი არ აქვს, ის თავის ადგილზე რჩება. ვითარების გასარკვევად ჟენევის დისკუსიების ფარგლებში შექმნილია ინციდენტების პრევენციისა და მათზე რეაგირების მექანიზმი“, - განაცხადა კარასინმა.

მისი თქმით, ნორმალური ურთიერთობის განვითარებისთვის საჯარო დემონსტრაციები და პროვოკაციები საჭირო არ არის.

„გარწმუნებთ, რომ ჩვენ გვეყოფა მოთმინება და გავაგრძელებთ ურთიერთობების ნორმალიზების კურსს, ხოლო პროვოკატორებს სათანადო სიტყვიერ და ლოგიკურ წინააღმდეგობას გავუწევთ. სამხრეთ ოსეთის რესპუბლიკის ხელისუფლების განკარგულებით, ეს სასაზღვრო ნიშნები დაამონტაჟა რუსეთის სასაზღვრო სამსახურმა და ისინი ადგილზე იდგა მიმდინარე წლის 8 აპრილამდე. ვინ ამოიღო ისინი? ეს ხალხი უნდა იპოვონ და დასაჯონ პროვოკაციისთვის. არავის არაფერი არსად არ გადაუწევია. შეიკრიბონ ქართული მხარე, სამხრეთ ოსეთისა და ევროკავშირის სადამკვირვებლო მისიის წარმომადგენლები და გაერკვნენ ამ საკითხში“ - განაცხადა კარასინმა.