ევროპამ უნდა გაიცნობიეროს, რომ საქართველო მათი ენერგოუსაფრთხოებისთვისაც იბრძვის

ევროპამ უნდა გაიცნობიეროს, რომ საქართველო მათი ენერგოუსაფრთხოებისთვისაც იბრძვის - ხათუნა ლაგაზიძე

პოლიტიკა - 18:35, 14 Jul, 2015

1103

რუსეთის საოკუპაციო რეჟიმის მიერ ე.წ. საზღვრის გადმოწევს ფაქტს და საოკუპაციო ზოლში ბაქო-სუფსის ნავთობსადენის ნაწილის მოქცევას ეხმაურება ხათუნა ლაგაზიძე. ექსპერტი აცხადებს, რომ საქართველოს ხელისუფლებამ დაუყოვნებლივ უნდა მიმართოს ბაქო-სუფსის პროექტში მონაწილე მხარეებს და საერთაშორისო ორგანიზაციებს, შეაფასონ რუსეთის ეს ქმედება, როგორც ევროპის ენერგოუსაფრთხოების წინააღმდეგ მიმართული აქტი.

,,რუსეთის მხრიდან მცოცავი ანექსიის მორიგი ფაქტი დამანგრეველია იმდენად, რამდენადაც გამოუსწორებელ დარტყმას აყენებს საქართველოს საერთაშორისო ფუნქციას. რუსეთი ამ აქტით ცდილობს ე.წ. სამხრეთ ოსეთის მთავრობა საერთაშორისო ურთიერთობების სუბიექტად აქციოს, მაგალითად მოლაპარაკების მაგიდასთან დასვას იგივე BP-სთან. ჩვენ უკვე მოვისმინეთ მსგავსი შეთავაზებები დე-ფაქტო სამხრეთ ოსეთის ხელისუფალთაგან, რომ რადგან ნავთობსადენის გარკვეული მონაკვეთი ე.წ. სამხრეთ ოსეთის ტერიტორიაზე გადის, ამიტომ ისინი პირდაპირ მოლაპარაკებებში უნდა ჩაერთონ BP-სთან. საქართველოს ხელისუფლებამ დაუყოვნებლივ უნდა მიმართოს ბაქო-სუფსის პროექტში მონაწილე მხარეებს და საერთაშორისო ორგანიზაციებს, შეაფასონ რუსეთის ეს ქმედება, როგორც ევროპის ენერგოუსაფრთხოების წინააღმდეგ მიმართული აქტი. ამასთან, საქართველოს ხელისუფლებამ უნდა მომზადოს ნიადაგი, რომ მილსადენის დღესდღეობით რუსეთის მიერ კონტროლირებადი მონაკვეთი, საერთაშორისო კონტროლს დაექვემდებაროს. ამ მიზნით საქართველოს ხელისუფლების აქტიურობა აუცილებელი და გადაუდებელია, ისევე როგორც სათანადო რეაქციები საერთაშორისო მოთამაშეების, დასავლეთის მხრიდან. ჩვენ უნდა ვიცოდეთ, რომ ამ ბრძოლაში მარტონი არ ვართ. ევროპამ უნდა გაიცნობიეროს, რომ ეს მათი ბრძოლაა, საქართველო მათი უსაფრთხოებისთვის, მათ შორის, უპირველესად ენერგოუსაფრთოებისთვისაც იბრძვის. აქ მნიშვნელობა არ აქვს იმას, რა მოცულობის რესურსი გადის არსებულ მილსადენში. აქ საუბარია საქართველოს, როგორც ევროპისთვის ალტერნატიული ენერგოდერეფნის ფუნქციაზე“ - აღნიშნავს ხათუნა ლაგაზიძე.