Stop Russia! - მთავრობის კანცელარიის წინ ოკუპაციის საწინააღმდეგო აქცია დაიგეგმა

პოლიტიკა - 13:25, 14 Jul, 2015

2004

შაბათს, საღამოს 6 საათზე საქართველოს მთავრობის კანცელარიის წინ რუსული ოკუპაციის წინააღმდეგ მიმართული საპროტესტო აქცია იმართება, რომლის ორგანიზატორები „ტაბულა“ და არასამთავრობო ორგანიზაცია „საქართველოს რეფორმების ასოციაციაა“. აქციაზე მთავრობის მიმართ რამდენიმე მოთხოვნა იქნება გაჟღერებული, ამ მოთხოვნის შესახებ ღონისძიების „ფეისბუკგვერდზეა“ საუბარი.

„რუსეთი ჩვენი ქვეყნის დაპყრობას აგრძელებს როგორც ხისტი, ისე რბილი ძალის მეშვეობით.

ახალ-ახალ ტერიტორიებს ვკარგავთ. პუტინის ევრაზიული კავშირის მხარდამჭერი რიტორიკა კი უფრო და უფრო აგრესიული ხდება.

ამ დროს, ხელისუფლება გვიმტკიცებს, რომ "განსაკუთრებული არაფერი ხდება".

იმისთვის, რომ მმართველ ძალას საქართველოს ხელახალი “განსაბჭოების” პროცესის განსაკუთრებული მიუღებლობა შევაგნებინოთ, შევიკრიბოთ საქართველოს მთავრობის კანცელარიასთან შაბათს, 18 ივლისს, 18:00 საათზე.

აქციის მოთხოვნებია:

1) შეწყვიტოს აბაშიძემ კარასინთან პირისპირ საუბარი.
2) ყველა მოლაპარაკება მოსკოვთან წარიმართოს ჩვენი სტრატეგიული პარტნიორების მონაწილეობით.
3) პარლამენტმა მიიღოს კანონი კოლაბორაციონიზმის წინააღმდეგ“- ნათქვამია აქციის ფესიბუკგვერდზე.

აღნიშნულ აქციას უერთდებიან სხვადასხვა არასამთავრობო ორგანიზაციები და მედია საშუალებები: ტაბულა, თავისუფლების ინსტიტუტი, მედიის განვითარების ფონდი-MDF, ფონდი ALPE, საქართველოს რეფორმების ასოციაცია, საქართველოს დემოკრატიული ინიციატივა / Georgian Democracy Initiative, ტოლერანტობის და მრავალფეროვნების ინსტიტუტი - TDI.