"საგარეო უწყების მიმართ კითხვები ჩნდება" - NGO-ები საზღვრის გადმოწევას ეხმაურებიან

პოლიტიკა - 13:24, 14 Jul, 2015

1320

„ახალგაზრდა იურისტთა ასოციაცია“ საოკუპაციო რეჟიმის მიერ ე.წ. საზღვრის გადმოწევის ფაქტს ეხმაურება და საგარეო საქმეთა სამინისტროს მუშაობასთან დაკავშირებით კითხვები აქვს.

როგორც ორგანიზაციის თავმჯდომარემ ანა ნაცვლიშვილმა განაცხადა, საგარეო უწყება აქტიურად უნდა მუშაობდეს, რომ რუსეთის უკანონო ქმედების შესახებ საერთაშორისო საზოგადოება ინფორმირებული იყოს.

"ძალიან მნიშვნელოვანია, რომ საგარეო უწყება მუშაობდეს მაქსიმალურად აქტიურად და მთელი საერთაშორისო საზოგადოებრიობა იყოს ინფორმირებული იმ გაუგონარი და უკანონო მოქმედებების შესახებ, რომელსაც ეწეოდა და განაგრძობს რუსეთის ფედერაცია. ამ მიმართულებით გარკვეული კითხვის ნიშნები ნამდვილად ჩნდება, რამდენად აქტიურია საგარეო უწყება და სხვა სახელმწიფო დაწესებულებები?“ - განაცხადა ანა ნაცვლიშვილმა.

„საერთაშორისო გამჭირვალობის“ აღმასრულებელი მდივანი კი მიიჩნევს, რომ საქართველოს მთავრობამ ყველაფერი უნდა გააეკთოს საოკუპაციო ხაზთან მცხოვრები მოქალაქეების უსაფრთხოების დასაცავად.

"მნიშვნელოვანი არის, რომ მთავრობამ გაიზიაროს რაც შეიძლება მეტი რეკომენდაცია ამ საკითხთან დაკავშირებით. ვფიქრობ, რომ შეუძლებელი არ არის ის, რომ ჩვენ ვიცოდეთ რა საფრთხეები გველის რუსეთისგან. ჩვენი ტერიტორიის რომელი ნაწილი შეიძლება მოხვდეს მათი ოკუპაციის ქვეშ და შესაბამისად უზრუნველვყოთ იმ მოსახლეობის უსაფრთხოება, რომელიც ცხოვრობს ადგილებზე", - განაცხადა გიგაურმა.