,,დაგვეხმაროს ვინმე...“ - საზღვრისპირა სოფლების მოსახლეობა მხოლოდ რუსულ არხებს უყურებს

პოლიტიკა - 15:39, 11 Jul, 2015

1975

გორის რაიონის იმ სოფლებში, რომლებიც საოკუპაციო ხაზს ესაზღვრება, რუსული და ოსური არხები ყოველგვარი ლიცენზიის გარეშე მაუწყებლობენ, დაახლოებით საუბარია 10 სატელევიზიო არხზე, რომლის სიგნალსაც ადგილობრივი მაცხოვრებლები სახლის სახურავზე დამონტაჟებული ანტენით იღებენ. რაც შეეხება ქართულ არხებს, პირობით საზღვართან მცხოვრებთა უმეტესი ნაწილი ქართული არხების სიგნალის მიღებას ვეღარ ახერხებს, მათგან მიძმე სოციალური მგოგმიარეობის გამო ისინი ციფრული სიგნალის მიმღები აპარატის ე.წ. სეთ ბოქსების შეძენას ვერ ახერხებენ და იძულებული არიან უყურონ რუსულ მაუწყებლობას.

"ჯერ ერთი გვიან გავიგეთ, რომ ვეღარ დავიჭერდით ქართულ არხებს აპარატის გარეშე რომელიც საჭიროა სიგნალის მისაღებად, ეს აპარატი კიდევ ძვირი ღირს. სად მაქვს მაგის საშუალება, რომ ვიყიდო? თავს ძლივს ვირჩენთ სოფელში, აგერ აქვე დგანან რუსები. რა უნდა გავაკეთოთ რითი ვიცხოვროთ. ეხლა რომ გათიშეს ქართული არხები ვეღარაფერს ვიგებთ რა ხდება ქვეყანაში. ვუყურებ რუსულ არხებს და კიდევ ერთი ოსური არხია, ცხინვალში რაც ხდება იმას გადმოსცემს. დაგვეხმაროს ხალხს ვინმე, მე არც სოციალური მომცეს და არც საპენსიო ვარ ჯერ რითი ვიყიდო? კი იყიდეს სოფელში ეგ აპარატები ვისაც ჰქონდა ფული მაგრამ არის ხალხი დარჩენილი ვინც ვერ ყიდულობს, ჩვენ ხომ ცოდონი ვართ არა? "-ამბობს სოფელ ქვეშის მკვიდრი ნუგზარ ბიბილაშვილი "ნიუპოსტთან" საუბრისას.

როგორც „ნიუპოსტს“ ზაქარეიშვილის უწყებაში განუცხადეს, ე.წ. სეთ ბოქსების შეძენასთან დაკავშირებით საქართველოს ყველა მოსახლეზე, მათ შორის საზღვრისპირა სოფლებში მცხოვრებ ხალხზე ერთი და იგივე წესი ვრცელდება.

„თუ ოჯახი სოციალურად დაუცველია, ის მიიღებს ე.წ. ბოქსებს, ხოლო დანარჩენ მოსახლეობაზე იგივე წესი ვრცელდება, რაც საქართველოს დანარჩენ მოსახლეობაზე და მათ თავად მოუწევთ ამ მოწყობილობის შეძენა“ - განაცხადეს უწყებაში.