ზურაბ ჟვანიას დაცვის ყოფილი წევრის, მიხეილ ძაძამიას განცხადებით, გარდაცვალების დროს მისი ზურაბ ჟვანიასთან არყოფნა, ყოფილი პრემიერ-მინისტრის დაჟინებული მოთხოვნით იყო განპირობებული. ძაძამიას თქმით, იმის შესახებ თუ რა მიზეზით სთხოვა მას ზურაბ ჟვანიამ მარტო დატოვება, იგი პროცესის მიმდინარეობისას ისაუბრებს.

აღნიშნული განცხადება ძაძამიამ ნაფიცი მსაჯულების წინაშე სიტყვით გამოსვლისას გააკეთა.

"ზურაბ ჟვანია არ იყო მხოლოდ ჩემი დასაცავი, არამედ ის იყო ჩემი ოჯახის წევრი. მასთან მრავალწლიანი მუშაობის პერიოდში დაცვის თანამშრომლებს ყოველთვის გამოგვიჩენია მისადმი პატივისცემა და ერთგულება. ჩვემ მზად ვიყავით ნებისმიერ წუთს გაგვეღო სიციცხლე უანგაროდ, ამის ფაქტებიც იყო და ამას სასამართლოს სხდომაზე მოვყვები.

რაც შეეხება პროკურატურის ბრალდებას, თუ რატომ დარჩა ზურაბ ჟვანია მარტო, დაუცველი, იმ კონსპირაციულ ბინაში, მინდა ვთქვა, რომ მეც ძალიან მინდოდა იქ, მიმდებარე ტერიტორიაზე ვყოფილიყავი, მაგრამ ჩემი იქ ყოფნით რამე ეშველებოდა? დაცვის თანამშრომელი წინ აღუდგებოდა გაზის გაჟონვას? ჩემი იქ არ ყოფნა განპირობებული იყო ზურაბ ჟვანიას დაჟინებული თხოვნით, ამას ჰქონდა თავისი ფაქტორები და ამ ფაქტორებს სასამართლო პროცესის მიმდინარეობის დროს დეტალურად მოვყვები."- განაცხადა მიხეილ ძაძამიამ.