ექსპერტი თორნიკე შარაშენიძე არ გამორიცხავს, რომ კრემლი ნინო ბურჯანაძის მეშვეობით საქართველოში პრორუსული ძალების გაძლიერებას გეგმავდეს.

ამის შესახებ ექსპერტმა „ნიუპოსტთან“ საუბარში „დემოკრატიული მოძრაობის“ ლიდერის მოსკოვში ვიზიტის კომენტირებისას განაცხადა.

„ნინო ბურჯანაძის ნიშა არის, რომ მე დავალაგებ რუსეთთან ურთიერთობას. ამბობს, რომ ეს ვერც ერთმა მთავრობამ ვერ შეძლო და მე ვიქნები თქვენი მესია რუსეთთან ურიერთობის დალაგების ამბავშიო. იმედია საქართველოს მოსახლეობის დიდი ნაწილი ამას ადეკვატურ შეფასებას მისცემს. მას არანაირი უფლება არ აქვს რუსეთში ვინმეს სახელით ილაპარაკოს. რასაკვირველია, ამ შემთხვევაში კრემლის მხრიდანაც არის დაინტერესება. ბურჯანაძე ალბათ ეცდება რომ რუსეთში ფულიც იშოვოს. არ არის გამორიცხული ფინანსური ხარდაჭერაც მიიღოს. არსებობს ვარიანტი, რომ კრემლი ცდილობდეს ბურჯანაძის მეშვეობით საქართველოში პრორუსული ძალების გაძლიერებას. არამგონია ბურჯანაძეს ეს გამოუვიდეს“, - განაცხადა შარაშენიძემ.

ნინო ბურჯანაძე რუსეთში ორი დღის წინ გაემგზავრა. როგორც ცნობილია, ის მოსკოვში დუმის სპიკერის მიწვევით იმყოფება. ჯერჯერობით უცნობია, მოხდება თუ არა ვლადიმერ პუტინისა და ნინო ბურჯანაძის პირისპირ შეხვედრა.