"ეს მისი პირადი პრობლემაა"- ბერძენიშვილი NATO-ს შესახებ ქავთარაძის პოზიციას არ იზიარებს

პოლიტიკა - 15:19, 08 Jul, 2015

1062

საპარლამენტო უმრავლესობის წევრი, „რესპუბლიკელი“ დავით ბერძენიშვილი, ნატოში გაწევრიანებასთან დაკავშირებით, მისი კოალიციის წევრის გოგი ქავთარაძის მიერ გაკეთებულ განცხადებას გამოეხმაურა. ბერძენიშვილის თქმით, თუ გოგი ქავთარაძეს ნატოსთან დაკავშირებით რაიმე ეჭვი გააჩნია, ეს მისი პირადი პრობლემაა და არა კოალიცია „ქართული ოცნების“ .

„მე ვსაუბრობ კოალიცია „ქართული ოცნების“ პოლიტიკური საბჭოს წევრის სტატუსით. კოალიციის მმართველი ორგანოსთვის - საქართველოს პლებისციტით დადასტურებული არჩევანი, ხელისუფლების მიერ დაპირებული და რეალიზაციის გზაზე მყოფი, თავდაცვის მინისტრის განსაკუთრებული აქტიურობით ნატოსთან ინტეგრაციის მიმართულებით - ეს დადასტურებულია. ცალკეული დეპუტატის რაიმე ეჭვი ეს არის მისი პირადი პრობლემა და ეს არავითარ კავშირში არ შეიძლება იყოს კოალიცია „ქართული ოცნებასთან“ - განაცხადა ბერძენიშვილმა.

შეგახსენებთ, დღეს საპარლამენტო უმრავლესობის წევრმა, გოგი ქავთარაძემ განაცხადა, რომ საქართველო რეგიონში დაცინვის საგანი გახდა, იმის გამო, რომ ამდენი წელი ნატოსკენ მიისწრაფის, ჩრდილო ატლანტიკური ალიანსი კი გაწევრიანებაზე უარს ეუბნება.