ვაზიანში ნატო-ს მრავალეროვნული სამხედრო სწავლება დაიწყო

პოლიტიკა - 13:34, 08 Jul, 2015

1064

ვაზიანში მეოთხე მექანიზებული ბრიგადის სამწყობრო მოედანზე ნატო-ს მრავალეროვნული სამხედრო სწავლება Agile Spirit 2015 ოფიციალურად გაიხსნა. გახსნის ცერემონიაზე საქართველოს ჰიმნი შესრულდა. სამხედროებმა წუთიერი დუმილითსაქართველოს ერთიანობისთვის დაღუპულთა ხსოვნას პატივი მიაგეს.

სამხედრო სწავლება ნატო-საქართველოს არსებითი პაკეტის ფარგლებში ხორციელდება. უელსის სამიტზე მიღებული არსებითი პაკეტის ერთ-ერთი პრიორიტეტული მიმართულება სწორედ საქართველოს ტერიტორიაზე ნატო-ს სწავლებების ჩატარება წარმოადგენს.

სამხედრო სწავლებაში მონაწილეობას აშშ-ს, ბულგარეთის, რუმინეთის, ლიტვისა და ლატვიის სამხედრო მოსამსახურეები მიიღებენ. საქართველოს მხრიდან წვრთნაში მეოთხე მექანიზებული ბრიგადის 42-ე ბატალიონი ჩაერთო. აშშ-ს საზღვაო ქვეითთა კორპუსი წვრთნებზე 220-მდე სამხედრო მოსამსახურით არის წარმოდგენილი. სხვა ქვეყნები წვრთნებში ოცეულებით მონწილეობენ.

მრავალეროვნული სამხედრო სწავლება Agile Spirit 2015 საშტაბო და საველე მომზადებას მოიცავს. სწავლება 22 ივლისამდე გაგრძელდება. მის ფარგლებში ძირთადად ქართველი სამხედრო მოსამსახურეებით დაკომპლექტებული მრავალეროვნული ბრიგადის შტაბი ჩამოყალიბდა. საშტაბო და საველე წვრთნების მიზანს კონვენციური ოპერაციების დროს ურთიერთქმედებების დახვეწა და სხვადასხვა ქვეყნების სამხედრო ტაქტიკის გაცნობა წარმოადგენს.