ეროვნული ბანკის შესახებ კანონპროექტთან დაკავშირებით NGO-ები ჰერმანს მიმართავენ

პოლიტიკა - 13:10, 08 Jul, 2015

922

არასამთავრობო ორგანიზაციების ნაწილი ეროვნული ბანკიდან საზედამხედველო ფუნქციის გამოყოფასთან დაკავშირებით საქართველოში ევროკავშირის ელჩს - იანოშ ჰერმანს წერილით მიმართავს.

მესამე სექტორის წარმომადგენლები კანონპროექტის პირველი მოსმენით მიღების გამო შეშფოთებას გამოთქვამენ.

არასამთავრობო ორგანიზაციები ელჩს მიმართავენ, რომ განმარტოს თუ რა შედეგი დადგება თუკი დაირღვევა ასოცირების ხელშეკრულების ის ნაწილი, რომელიც ეროვნულ ბანკს უკავშირდება.

"კანონპროექტის ერთ-ერთმა მხარდამჭერმა, საქართველოს პარლამენტის წევრმა ზურაბ ტყემალაძემ სატელევიზიო დებატების დროს აღნიშნა, რომ კონსულტაციებში მონაწილეობდნენ საერთაშორისო ორგანიზაციების წარმომადგენელი ექსპერტები. მოგმართავთ თხოვნით, ოფიციალურად დაადასტუროთ ეს ფაქტი და მოგვაწოდოთ ევროკავშირის ექსპერტების სია, რომლებიც მონაწილეობდნენ კონსულტაციებში და ასევე, მსგავსი სამუშაო შეხვედრების კონკრეტული თარიღები", - ნათქვამია ევროკავშირის ელჩისადმი გაგზავნილ წერილში, რომელსაც ხელს აწერს 15 არასამთავრობო ორგანიზაცია - ასოციაცია "მწვანე ტალღა", "ბალტიისა და შავი ზღვის ალიანსი – საქართველო", "ეკონომიკური პოლიტიკის კვლევის ცენტრი", "კვლევითი ჟურნალისტიკის და ადვოკატირების ცენტრი", "მედის განვითარების ფონდი", "მომავლის ინიციატივა", "საზოგადოება და ბანკები", საინფორმაციო პოღტალი – "ევროპა საქართველოსთვის", "სამართლიანი არჩევნებისა და დემოკრატიის საერთაშორისო საზოგადოება", "საქართველოს დემოკრატიული ინიციატივა", "საქართველოს რეფორმების ასოციაცია", "საქართველოს სტრატეგიიული კვლევებისა და განვითარების ცენტრი", სტუდია "მონიტორი", "ტოლერანტობის და მრავალფეროვნების ინსტიტუტი", "ხმა საქართველოდან", Georgianreview.ge, თბილისის თავისუფალი უნივერსიტეტისა და აგრარული უნივერსიტეტის ბიზნეს სკოლების დეკანი გიგა ბედინეიშვილი.