ქართული მხარის მოთხოვნა კომპენსაციის გადმოცემაზე რუსეთს ამ კვირაში გადაეგზავნება

ქართული მხარის მოთხოვნა კომპენსაციის გადმოცემაზე რუსეთს ამ კვირაში გადაეგზავნება - წულუკიანი

პოლიტიკა - 18:08, 07 Jul, 2015

1223

იუსტიციის მინისტრს - თეა წულუკიანს სტრასბურგის სასამართლოსთან ჰქონდა კონსულტაცია, სადაც გადაწყდა, რომ ქართული მხარის მოთხოვნა რუსეთს მიმდინარე კვირას გადაეგზავნება.

ამის შესახებ წულუკიანმა „კურიერთან“ საუბარში განაცხადა.

„სტრასბურგის სასამართლოს რეგლამენტის თანახმად მხარეები ერთმანეთთან პროცედურის ამ ეტაპზე არ ურთიერთობენ, ეს ურთიერთობა მხოლოდ სასამართლოს გავლით ხდება. საქართველომ დადგენილ ვადებში სასამართლოს თავისი მოთხოვნა გაუგზავნა და სტრასბურგის სასამართლო ამ კვირაში ჩვენს პოზიციას რუსეთის იუსტიციის სამინისტროში გადააგზავნის და მას მოსთხოვს კონტრარგუმენტებს ჩვენს მიერ წარმოდგენილ პოზიციაზე“ - განაცხადა წულუკიანმა.

რუსეთის იუსტიციის სამინისტროს მიერ გამოქვეყნებულ განცხადებაში ნათქვამია, რომ მოსკოვისთვის უცნობია, თუ რას ითხოვს საქართველო მათგან დეპორტაციის საქმეზე.

უწყებაში ამბობენ, რომ მოსკოვს საქართველოს მხრიდან კომპენსაციასთან დაკავშირებით მოთხოვნა არ მიუღია.

მათი თქმით, რუსეთის პოზიცია ამ საკითხზე მას შემდეგ გახმაურდება, რაც სტრასბურგის სასამართლო მოსკოვს ოფიციალურად გააცნობს საქართველოს წინადადებას.

2015 წლის 2 ივლისს საქართველოს იუსტიციის სამინისტრომ 2006 წლის შემოდგომაზე რუსეთის ფედერაციიდან კოლექტიურად გამოძევებული ქართველების დარღვეული უფლებების აღდგენის მიზნით სტრასბურგის სასამართლოში საქართველოს პოზიციის ამსახველი დოკუმენტი წარადგინა და კომპენსაცია, 70,320,000 ევრო მოითხოვა.