საქართველოს მოსახლეობა დემოგრაფიულად ძალიან დაბერებულია- ხუნდაძე

პოლიტიკა - 17:56, 07 Jul, 2015

1026

დღეს, საქართველოს პარლამენტის კინო-დარბაზში გაიმართა კონფერენცია თემაზე - „დაბერების პოლიტიკა საქართველოში“. კონფერენცია გაიმართა ჯანდაცვისა და სოციალურ საკითხთა კომიტეტის თავმჯდომარის დიმიტრი ხუნდაძის ინიციატივით, საქართველოს დემოგრაფიული აღორძინების ფონდთან, გაეროს მოსახლეობის ფონდისა და აშშ საერთაშორისო დახმარების სააგენტოსთან თანამშრომლობით.

კონფერენციაზე დემოგრაფიული აღორძინების ფონდის თავმჯდომარემ თამარ ჩიბურდანიძემ წარმოადგენა ბოლო ერთი საუკუნის მანძილზე საქართველოს მოსახლეობის დაბერების დინამიკა. გაეროს მოსახლეობის ფონდმა და აშშ საერთაშორისო დახმარების სააგენტომ წარმოადგინეს რეკომენდაციები, თუ როგორ უნდა განავითაროს სახელმწიფომ დაბერების პოლიტიკა ქვეყანაში.

„იდეა, რის შესახებაც ყველანი ვერთიანდებით არის ის, რომ მოსახლეობის დაბერება არ არის საშიშროება, რომელიც უნდა იქნას არიდებული. ეს არ არის ნეგატიური ტენდენცია, რომლის უკუქცევასაც უნდა ვეცადოთ - ეს არის დემოგრაფიული გარდაქმნის გარდაუვალი რეალობა, რომლის ფარგლებშიც უნდა მოხდეს პოლიტიკის დარეგულირება.

თუ 1897 წელს ბავშვების რაოდენობა 703 ათასით ჭარბობდა მოხუცების რაოდენობას, ხოლო 1959 წელს - 741 ათასით, 2014 წელს უკვე მოხუცების რაოდენობა ჭარბობს ბავშვების რაოდენობას 98 ათასი კაცით. დღეს საქართველოს მოსახლეობა დემოგრაფიულად ძალიან დაბერებულია.

ხანდაზმული პირების მზარდი ხვედრითი წილის ზრდის შედეგები უნდა განვიხილოთ პოლიტიკის ყველა მიმართულებით: ეკონომიკა, ჯანდაცვა და სოციალური სფერო, შრომის ბაზარი, განათლება, თაობათაშორისი ურთიერთობები და გენდერი.

ჩვენი სტრატეგია ორი მიმართულებით უნდა განხორციელდეს:- ხანდაზმულთა შესახებ სახელმწიფო პოლიტიკის შემუშავება, შობადობის მაჩვენებლების გაუმჯობესება და ძირითადი აქცენტების გაკეთება მწარმოებელ ფენაზე, ანუ, ახალგაზრდობაზე. ეს იქნება ჩვენს მიერ შემუშავებული სწორი სტარტეგია“,- განაცხადა დიმიტრი ხუნდაძემ.

კონფერენციის ბოლოს კომიტეტის თავმჯდომარემ დიმიტრი ხუნდაძემ დამსწრე საზოგადოებას გააცნო რეზოლუციის ტექსტი, რომელსაც ხელს აწერენ წარმოდგენილი მხარეები. რეზოლუციის თანახმად, შეიქმნება მულტისექტორული საბჭო, რომელიც შეიმუშავებს კონკრეტულ ინიციატივებს 1 წლის მანძილზე. საბჭოს უხელმძღვანელებს დიმიტრი ხუნდაძე.

კონფერენციის შემდეგ, პარლამენტის თამარ მეფის დარბაზში დაბერების თემიდან გამომდინარე, გაიმართა ფოტოგამოფენა.