პრეზიდენტის თქმით, ქვეყნის წინაშე დგას რამდენიმე პრინციპული ამოცანა დგას და მათ შორის არის ქალთა როლის გასაძლიერებლად საკანონმდებლო სივრცეში ცვლილებების განხორციელება.

ამის შესახებ გიორგი მარგველაშვილმა გენდერული თანასწორობის 2015 წლის კონკურსში გამარჯვებულთა დაჯილდოებაზე განაცხადა.

მისი თქმით, ძალადობის მიმართ აქტიური უნდა იყოს საზოგადოება და შინაგან საქმეთა სამინისტრო.

"ჩვენთვის სამარცხვინოა ის, რაც დაგვემართა. ჩვენს წინაშე დგას რამდენიმე პრინციპული ამოცანა. პირველი არის ის, რომ ძალადობის მიმართ ძალიან აქტიური უნდა იყოს საზოგადოება და აღნიშნულთან დაკავშირებით პროტესტს აფიქსირებდეს ყველგან და ყველა დონეზე. ასევე მნიშვნელოვანია, რომ შინაგან სამინისტრომაც ეფექტურად აუწყოს ფეხი ამ ტენდენციას და უფრო დეტალურად იყოს ჩახედული, როცა საუბარია სქესობრივ ნიადაგზე ძალადობაზე. მესამე – ჩვენ ასევე უნდა გავატაროთ ცვლილებები თუნდაც საკანონმდებლო სივრცეში. ამ თვალსაზრისით მე არაერთხელ დავუჭირე მხარი საარჩევნო კოდექსში ქალთა თანასწორობის მიმართულებით გადასადგმელ ნაბიჯებს და იმედი მაქვს, რომ პარლამენტში ამას მხარს დაუჭერენ არა მარტო ქალები, არამედ მამაკაცი დეპუტატებიც, ვისთვისაც საკუთარი პოლიტიკური შეხედულებები და საკუთარი თუნდაც მამაკაცობა ვლინდება ქალების დაცვის და მათზე ზრუნვის გამოხატვის თვალსაზრისით“, - განაცხადა მარგველაშვილმა.