პარლამენტი არჩეულია ხალხის მიერ და მას უნდა ჰქონდეს კომუნიკაცია საზოგადოებასთან

პარლამენტი არჩეულია ხალხის მიერ და მას უნდა ჰქონდეს კომუნიკაცია საზოგადოებასთან - უსუფაშვილი

პოლიტიკა - 13:02, 06 Jul, 2015

980

პარლამენტში სპეციალური ჯგუფის შეხვედრა მიმდინარეობს, რომელის საკანონმდებლო ორგანოს ღიაობის საკითხზე მუშაობს. ჯგუფის შემადგენლობაში შედიან დეპუტატები და სამოქალაქო სექტორის წარმომადგენლები. შეხვედრას პარლამენტის თავმჯდომარეც ესწრება. როგორც უსუფაშვილმა სიტყვით მიმართვისას განაცხადა, ყველაფერი კეთდება იმისთვის, რომ პარლამენტის საქმიანობა უფრო ღია იყოს.

„პარლამენტი არჩეულია ხალხის მიერ და მას უნდა ჰქონდეს ყოველდღიური კომუნიკაცია საზოგადოებასთან, ყველა იმ საკითხზე რაც პარლამენტში იხილება. ამასთან, ეს კომუნიკაცია არ უნდა იყოს მხოლოდ ცალმხრივი. მოსახლეობას საშუალება უნდა ჰქონდეს ყოველდღიური შესაძლებლობა, რომ საკუთარი პოზიცია უკეთ გამოხატოს განსახილველ საკითხებზე. ხშირად არის ჩივილი, რომ კომიტეტის სხდომაზე უცებ ჩნდება საკითხი, რომელიც წინასწარ არ იყო დღის წესრიგში და დაინტერესებულ პირს არ ჰქონდა საშუალება, ის ამ თემას გაცნობოდა. ერთი მხრივ, ეს გარდაუვალია რადგან ცხოვრება დინამიურია და შეიძლება ეს თემა გუშინ გაჩნდა, მაგრამ მეორე მხრივ, ბოროტად არ უნდა ვისარგებლოთ ამ ტიპის ნოვაციებით. ასევე არის თემები, რომ პარლამენტის მიერ მიღებული გადაწყვეტილებები ვებ-გვერდზე გამოქვეყნდეს ისე, რომ შეიძლებოდეს მასზე კომენტირება. კანონი სიცოცხლეს იწყებს მისი შექმნის მომენტიდან და ჩვენთან მთავრდება კანონზე ფიქრი, როგორც კანონს მივიღებთ - ჩაითვალა რომ მორჩა“, - განაცხადა უსუფაშვილმა.