ზურაბ ჟვანიას საქმეზე სასამართლო პროცესი 8 ივლისიდან დაიწყება. "რუსთავი 2"-ს ცნობით, საქმეს ნაფიც მსაჯულთა სასამართლო განიხილავს. მათ წინაშე ზურაბ ჟვანიას დაცვის ყოფილი უფროსი კობა ხარშილაძე და ყოფილი პრემიერის უსაფრთხოების სამსახურის თანამშრომელი მიხეილ ძაძამია წარდგებიან.

ნაფიცი მსაჯულების მიერ გასამართლება თავად ჟვანიას დაცვის წევრებმა მოითხოვეს.

"ნაფიცი მსაჯულები საზოგადოების წევრები არიან და საქართველოს მოქალაქეები. ჩვენი გადაწყვეტილება ნაფიც მსაჯულებთან დაკავშირებით სწორედ ამან განაპირობა. გვინდა, რომ საქმეს გაეცნოს საზოგადოებას. ღიად საჯაროდ გამოვიტანთ გარემოებებს და ამის შემდეგ საზგოდოებამ განსაჯოს რამდენად სწორედ მოიქცა კობა ხარშილაძე,"- აცხადებს ბრალდებულების ადვოკატი ბექა ბასილაია.

ნაფიცი მსაჯულების შერჩევა 6 თვის განმავლობაში მიმდინარეობდა. ასობით კანდიდატმა გასაუბრება გაიარა, შერჩეული პირები განაჩენს ჟვანიას საქმეზე დაახლოებით ერთ თვეში გამოიტანენ.

მათი გადაწყვეტილება საბოლოო იქნება და გასაჩივრებას აღარ დაექვემდებარება.

პროცესზე მოწმის სახით დაიკითხებიან ხათუნა გოგორიშვილი, გიორგი ბარამიძე, გოკა გაბაშვილი და მიხეილ მაჭავარიანი.

პროკურატურამ ჟვანიას დაცვის სამსახურის წევრებს წაუყენა ბრალი სამსახურეობრივი გულგრილობის მუხლით, რამაც სიკვდილი გამოიწვია. განაპირობა თუ არა პრემიერის გარდაცვალება უსაფრთხოების სამსახურის გულგრილობამ, ამას ნაფიცი მსაჯულები დაადგენენ.