შინაგან საქმეთა მინისტრი ვახტანგ გომელაური ბარსელონა-სევილიას სუპერთასზე დასასწრები ბილეთების ე.წ. გადამყიდველებთან დაკავშირებით კომენტარს აკეთებს.

მინისტრის თქმით, მისი უწყება ზომებს იმ შემთხვევაში მიიღებს, თუ მას კონკრეტული დარღვევებით მოქალაქეები მიმართავენ.

"თუ ვინმე მოგვმართავს რაიმე დარღვევაზე ჩვენ დავიწყებთ გამოძიებას, მაგრამ ეს უფრო ფინანსური საკითხებია და ალბათ ფინანსური პოლიცია დაინტერესდება ამ თემით. ჩვენ თუ რაიმე დარღვევა იქნება და მოგვმართავენ რა თქმა უნდა, დავიწყებთ გამოძიებას, მაგრამ ვინმე თუ რამეს ყიდის ინტერნეტში რაღაც ფასად, ჩვენ მაგაზე ვერ ვეტყვით რატომ ყიდის ამ ფასად", - განაცხადა გომელაურმა.

"ონლაინ-გადამყიდველები" ბარსელონა - სევილიას სუპერთასის ბილეთებს ყიდიან. mymarket-ზე ამ დროისთვის იძებნება ორი განცხადება, რომლის მიხედვითაც თითო ბილეთის ღირებულება 300 დოლარია.

შეგახსენებთ, ფეხბურთის ფედერაციაში მომხმარებლებს მოუწოდებენ, რომ გადამყიდველებისაგან ელექტრონული ბილეთები არ შეიძინონ, რადგან ისინი შესაძლოა ყალბი იყოს, ასევე სუპერთასის მატჩზე შესვლის ერთ-ერთი წესის მიხედვით, დამატებითი გადამოწმების შემთხვევაში, მომხმარებლებს შეიძლება ბილეთთან ერთად პირადობის დამადასტურებელი მოწმობის წარდგენა მოსთოვონ, ამიტომ, აუცილებელია იმ პირის დასწრება, ვინც ბილეთები თვითონ შეიძინა ონლაინ.