კარასინის შეფასებით საქართველოს საგარეო უწყება საომარ რიტორიკას დაუბრუნდა

პოლიტიკა - 13:16, 01 Jul, 2015

1777

რუსეთის წარმომადგენლმა, გრიგორი კარასინმა ჟენევის მოლაპარაკებებზე განაცხადა, რომ მას საქართველოს საგარეო საქმეთა სამინისტროს მიერ მომზადებული მოხსენების - „ოკუპირებულ ტერიტორიებზე მცხოვრები ადამიანების უფლებების შესახებ“ - შინაარსი აშფოთებს. მისი თქმით ამ მოხსენებაში საომარი რიტორიკა გამოჩნდა.

"ყურადღება მიიქცია იმ ტონალობამ, რომელიც ასახულია საქართველოს საგარეო საქმეთა სამინისტროს მიერ მომზადებულ მოხსენებაში, ოკუპირებულ ტერიტორიებზე მცხოვრები ადამიანების უფლებების შესახებ. მოხსენება ისეა შედგენილი, რომ მასში მარტივად იკითხება რევანშიზმის იდეებისკენ დაბრუნება და ამ თემაზე ჩვენ დღეს აუცილებლად ვისაუბრებთ. ბრძოლისებრი არგუმენტებით საუბარი სამხრეთ კავკასიაში ახლა საერთოდ არ არის საჭირო და ეს უნდა ესმოდეთ თბილისშიც, სოხუმშიც და ცხინვალშიც. ამიტომ ჩვენ უნდა შევეცადოთ და გამოვნახოთ ურთიერთობის გარკვეული ფორმები იმისთვის რომ მოვაგვაროთ არსებული პრობლემები და 2008 წლის აგვისტოში წარმოქმნილი საკითხები ძალის გარეშე გადავჭრათ,“ - განაცხადა გრიგორი კარასინმა.

აღნიშნული განცხადება რუსეთის საგარეო საქმეთა მინისტრის მოადგილემ დღეს ჟენევის მოლაპარაკებების 32-ე რაუნდის ფარგლებში გასამართი მოლაპარაკებების დაწყების დროს გააკეთა.