"დამეხმარე, იქნებ "დავლაგდეთო"- რას სთხოვდა ალასანია პრემიერს?!

"დამეხმარე, იქნებ "დავლაგდეთო"- რას სთხოვდა ალასანია პრემიერს?! - ღარიბაშვილი გაუხმაურებელ დეტალებზე

პოლიტიკა - 11:59, 29 Jun, 2015

2591

საქართველოს პრემიერ-მინისტრმა ირაკლი ღარიბაშვილმა, გაზეთ „ასავალ დასავალთან“ ინტერვიუში, თავდაცვის ყოფილი მინისტრის ირაკლი ალასანიას შესახებაც ისაუბრა და აღნიშნა, რომ ალასანია ე.წ „კაბელების“ საქმესთან დაკავშირებით დემაგოგიას ეწევა.

"ხელისუფლებაში რომ მოვედით და ალასანია თავდაცვის მინისტრად დაინიშნა, მან პარტიის თავმჯდომარის პოსტი დატოვა, ვინაიდან თქვა, რომ ის არის საქართველოს თავდაცვის მინისტრი და არა რომელიმე პოლიტიკური ჯგუფის ლიდერი, რაც, მისი მხრიდან, სწორი საქციელი იყო. მაგრამ როცა ალასანიამ შეიტყო, რომ პროკურატურას გამოძიება ჰქონდა დაწყებული, იგი ჩემთან მოვიდა და მითხრა, პარტიის თავმჯდომარედ დაბრუნებას ვაპირებო. წარმოიდგინეთ, ამას მეუბნება თავდაცვის მინისტრი, რაც ჩემთვის აბსოლუტურად გაუგებარი იყო. რამდენიმე კვირის შემდეგ ალასანია კვლავ მოვიდა ჩემთან და მითხრა, ინფორმაცია მაქვს, რომ თავდაცვის სამინისტროს მაღალჩინოსნების მიმართ პროკურატურაში გამოძიება მიმდინარეობსო. მთხოვა, მთავარ პროკურორთან შეხვედრის ორგანიზებაში დამეხმარე და იქნებ, "დავლაგდეთო". მე მას ვუთხარი, რომ ასეთ საკითხებში პრინციპულად არ ჩავერეოდი და ჩემი ოჯახის წევრსაც რომ ეხებოდეს საქმე, გამოძიების პროცესში ვერ ჩავიხედავდი. ერთი სიტყვით, მთავარ პროკურორთან შეხვედრის ორგანიზებაზე უარი ვუთხარი, "დასალაგებელი" არაფერია, თუ ვინმეს დანაშაული აქვს ჩადენილი, უნდა დაისაჯოს და თუ არაფერი ჩაუდენიათ, რატომ ნერვიულობ-მეთქი? ამის შემდეგ ყველამ ვნახეთ, რა რეაქციაც ჰქონდა ალასანიას და ძალიან სამწუხარო იყო ის, რაც მან მოიმოქმედა. არც ერთი ნორმალური მთავრობა და მთავრობის მეთაური არ მიიღებდა იმას, რაც ალასანიამ ჩაიდინა – თავდაცვის მინისტრის რანგში პარტიის ოფისში პრესკონფერენცია ჩაატარა და პოლიტიკური განცხადებები გააკეთა. ეს იყო თავდაცვის სამინისტროსა და ჯარის პოლიტიზების პირდაპირი მცდელობა, შესაბამისად, მე გავაკეთე ის, რაც უნდა გამეკეთებინა, დიახ, აბსოლუტურად სწორი სახელმწიფოებრივი გადაწყვეტილება მივიღე , როცა ალასანია თანამდებობიდან გავათავისუფლე"- განაცხადა ირაკლი ღარიბაშვილმა.

პრემიერის შეფასებით, თავდაცვის ყოფილი მინისტრი დემაგოგობს და ამ ქმედებით ის მის ყოფილ თანაგუნდელებს- ნაციონალებს ბაძავს.

„ის დემაგოგია რასაც ალასანია ეწევა, აბსოლუტურად მიურებელია! სამწუხაროდ , იგი ბაძავს თავის ყოფილ თანაგუნდელებს- ნაციონალებს, რომლებთანან ერთადაც წლების განმავლობაში იმყოფებოდა!“- აღნიშნა ღარიბაშვილმა, მისი თქმით ლოგიკას არ ექვემდებარება ალასანიას ნათქვამი იმის შესახებ, რომ ე.წ „კაბელების“ საქმესთან კავშირი ბიძინა ივანიშვილს აქვს და თავდაცვის უწყების მაღალჩინოსნების ციხეში ყოფნა ივანიშვილის ინტერესებში შედის:

„რატომ უნდა ყოფილიყო ბიძინა ივანიშვილი დაინტერესებული ამა თუ იმ ადამიანის ციხეში ჩასმით? რა მოტივაცია უნდა ქონოდა ამისათვის? ეს არანაირ ლოგიკას არ ექვემდებარება და აბსოლუტური სიცრუეა, რასაც საზოგადოება არასოდეს მიიღებს“- განაცხადა პრემიერმა.

წყარო „ასავალ-დასავალი“