"თანამდებობრივი პოზიცია არ მაძლევს საშუალებას სებ-ის პრეზიდენტს ღიად დავდო ბრალი"- ღარიბაშვილი

პოლიტიკა - 11:27, 29 Jun, 2015

1105

საქართველოს პრემიერ-მინისტრმა ირაკლი ღარიბაშვილმა, გაზეთ „ასავალ დასავალთან“ ინმტერვიუში ეროვნული ვალუტის კურსთან დაკავშირებით ისაუბრა და ეროვნული ბანკის მუშაობა შეაფასა. პრემიერის თქმით სებ-სა და მთავრობის ეკონოიკურ გუნდს მოსახლეობისთვის უფრო კარგად უნდა აეხსნა, იმს მიზეზები, რაც ლარის კურსის ვარდნას იწვევს.

"დიახ, ეროვნული ბანკის, ფინანსთა და ეკონომიკის სამინისტროების მხრიდან შესაძლებელი იყო, მოსახლეობისთვის უფრო კარგად აგვეხსნა, თუ რა იწვევდა ლარის კურსის ვარდნას, რაც, პირველ ეტაპზე, სათანადოდ ვერ გაკეთდა. საერთოდ, ჩვენი ერთ-ერთი მთავარი პრობლემაა დოლარიზაციის მაღალი დონე. ჩვენს მოქალაქეებს ბანკებიდან სესხები აღებული აქვთ დოლარში. ლარში რომ ჰქონდეთ აღებული, ეროვნული ვალუტის გაუფასურება მათთვის ასეთი მტკივნეული არ აღმოჩნდებოდა. შესაძლოა, კურსის ვარდნა არც კი ეგრძნოთ. ხაზგასმით ვამბობ, რომ ფინანსთა სამინისტრო, ეკონომიკის სამინისტრო და ეროვნული ბანკი შეთანხმებულად უნდა მუშაობდნენ. აქვე აღვნიშნავ, რომ ჩვენი მთავრობის მხრიდან ყოველთვის არსებობდა ეროვნულ ბანკთან კონსტრუქციული ურთიერთობის სურვილი, რადგან ჩვენ ჩვენი ქვეყნის ეროვნული ინტერესების შესაბამისად ვმოქმედებთ და არა პირადი სურვილებისა და ემოციების მიხედვით", - განაცხადა ირაკლი ღარიბაშვილმა.. პრემიერის თქმით კრიზისულ სიტუაციაში ყველაზე მთავარი სიმშვიდის შენარჩუნებაა.

ირაკლი ღარიბაშვილმა სებ-ის პრეზიდენტის გიორგი ქადაგიძის შესახებაც ისაუბრა, ღარიბაშვილის განცხადებით მას თანამდებობრივი პოზიცია არ აძლევს საშუალებას, ეროვნულ ბანკსა და მის ხელმძღვანელს რამეში ღიად დასდოს ბრალი.

"ჩემგან, როგორც მოქმედი პრემიერ-მინისტრისგან, ამის გაკეთება მართებული არ იქნება. თუმცა ერთ რამეს პირდაპირ ვიტყვი – თუ იკვეთება რომ ესა თუ ის ადამიანი რაიმე ფორმით ქვეყნის განვითარებას ხელს უშლის, ამაზე შესაბამისმა ორგანოებმა უნდა იმუშაონ და ყველა შესაძლო საფრთხის პრევენცია მოახდინონ", - განაცხადა პრემიერ-მინისტრმა.