ხიდაშელი - მეზობლებზე თავდასხმის ნაცვლად, რუსეთი ჩრდილო კავკასიაში საფრთხეებით უნდა დაკავდეს

პოლიტიკა - 11:53, 28 Jun, 2015

1526

საქართველოს თავდაცვის მინისტრი თინათინ ხიდაშელი ბათუმის ნავსადგურში ამერიკული სამხედრო ხომალდის, "ლაბუნის" შემოსვლის ოფიციალურ ღონისძიებაზე იმყოფება.

თინა ხიდაშელმა საქართველოდან "ისლამური სახელმწიოფოს" ძალებში საბრძოლველად მეომრების წასვლის ფაქტსა და მათი კავკასიის რეგიონში შესაძლო გააქტიურების ფაქტს შეეხო.

მისი თქმით, თუ ISIS-ის მხრიდან მოსალოდნელ საფრთხეებს განვითარების საშუალება მიეცა ეს დამანგრეველი იქნება ნებისმიერი ქვეყნისთვის, მისი ზომის მიუხედავად.

"ის ფაქტი, რომ საქართველოდან, რომ აღარაფერი ვთქვათ ჩრდილო კავკასიაზე, მეომრები მიდიან მათ ძალებში საბრძოლველად, ეს უკვე ძალიან სერიოზული შეშფოთების და წუხილის საგანია, რასაც სჭირდება ადეკვატური, პოზიტიური რეაგირება როგორც საქართველოს მხრიდან, ასევე რუსეთის სახელმწიფოს მხრიდან. ცუდი არ იქნება, რომ რუსეთი უფრო მეტად კონცენტრირებული იყოს და დაკავდეს სწორედ ჩრდილო კავკასიაში საფრთხეების ერთი მხრივ შეფასებით და მეორე მხრივ მათზე რეაგირებით, ნაცვლად იმისა, რომ მეზობელ სახელმწიფოებში საომარ მოქმედებებს აწარმოებდეს. იმიტომ, რომ ეს არის საფრთხე იმ ტიპის, იმ ხარისხის, იმ მასშტაბის, რომელიც თუ მას მიეცა განვითარების საშუალება, შესაძლებელია, დამანგრეველი აღმოჩნდეს ნებისმიერი ქვეყნისთვის მისი ზომის მიუხედავად. ამიტომ ყველა ერთობლივი ძალით უნდა ვიყოთ ამ საფრთხესთან ბრძოლაში ჩართული და არა ერთმანეთთან ბრძოლაში ჩართული,"- განაცხადა თინა ხიდაშელმა.