,,ნაციონალური მოძრაობის“ წევრები მიხელ სააკაშვილთან შესახვედრად ხვალ უკრაინაში მიემგზავრებიან

პოლიტიკა - 14:02, 27 Jun, 2015

1652

„ნაციონალური მოძრაობის“ წევრები ხვალ უკრაინაში გაემგზავრებიან, სადაც საქართველოს ყოფილ პრეზიდენტს მიხეილ სააკაშვილს შეხვდებიან. ვიზიტი სავარაუდოდ ორდღიანი იქნება.

ამის შესახებ პარტიის წევრმა მიხეილ მაჭავარიანმა „ნიუპოსტთან“ საუბარში განაცხადა.

მისი თქმით, პარტიის თავმჯდომარეს ქვეყანაში შექმნილ ვითარებაზე ინფორმაციას მიაწვდიან და მოისმენენ თუ რა ვითარებაა უკრაინაში.

„უკრაინაში ხვალ მივემგზავრებით. ვაპირებთ შევხვდეთ მიხეილ სააკაშვილს. ვიზიტის ერთ-ერთი მიზანი სწორედ ეს არის, რომ სააკაშვილს ქვეყანაში შექმნილ მდგომარეობასთან დაკავშირებით ინფორმაცია მივაწოდოთ. ასევე გავეცნოთ უკრაინაში არსებულ ვითარებას. ეს ჩვეულებრივი შეხვედრაა. ეხლა ვინაიდან სესია მთავრდებოდა, დავგეგმეთ, რომ ვისაც ექნებოდა სურვილი წამოსულიყო უკრაინაში. გვაინტერესებს, როგორ მიდის უკრაინაში პროცესები. მოგეხსენებათ მიხეილ სააკაშვილის ოდესის გუბერნატორად დაინიშნა. ასევე ჩვენი თანაგუნდელები სხვადასხვა თანამდებობებზე მუშაობენ იქ. გვაინტერესებს, როგორ მიდის რეფორმები და თუ არის საჭირო ჩვენი დახმარება. ჩვენ გვჭირდება ძლიერი უკრაინა, როგორც უკრაინას სჭირდება ძლიერი საქართველო. ეს არ იქნება ორგანიზებული შეხვედრა. ვისაც გვაქვს საშუალება ვყიდულობთ ბილეთებს და მივდივართ. ორი დღე გავჩერდებით სავარაუდოდ. წასვლას ვაპირებთ რამდენიმე წევრი - მე, ირმა ნადირაშვილი, სერგო რატიანი, ზაზა ბიბილაშვილი, გიორგი ბარამიძე, ნუგზარ წიკლაური და ასე შემდეგ“, - განაცხადა მაჭავარიანმა.