მსოფლიო ბანკმა, ევროპის რეკონსტრუქციისა და განვითარების ბანკმა, საერთაშორისო სავალუტო ფონდმა, და აზიის განვითარების ბანკმა პრემიერ-მინისტრს ირაკლი ღარიბაშვილს ეროვნული ბანკიდან ზედამხედველობის ფუნქციის გამოყოფის საკითხთან დაკავშირებით წერილი გამოუგზავნეს. ცნობილია, რომ წერილის შინაარსი საკმაოდ კრიტიკულია.

საერთაშორისო ფინანსური ორგანიზაციები ზედამხედველობის სამსახურის გამოყოფას ეწინააღმდეგებიან.

„პარლამენტში წარმოდგენილი ცვლილებების ამოქმედება დაასუსტებს საქართველოში საბანკო ზედამხედველობის ხარისხსა და დამოუკიდებლობას. ახალი საბანკო ზედამხედველობის სააგენტოს შემოთავაზებულ სტრუქტურას შესაძლოა მოჰყვეს არაადეკვატური დამოუკიდებლობა...“, - ნათქვამია წერილში.

პარლამენტში დღეს ეროვნული ბანკის შესახებ კანონში ცვლილებებს კენჭს უყრიან. საუბარია საბანკო ზედამხედველობის სააგენტოს შემოღებაზე, რომელსაც შვიდ კაციანი საბჭო ეყოლება.

გუშინ კანონპროექტს დეპუტატები 4 საათის განმავლობაში განიხილავდნენ, თუმცა აღნიშნულ საკითხზე მათი პოზიცია არ შეცვლილა.

ცნობილია, რომ „ნაციონალური მოძრაობისა“ და „თავისუფალი დემოკრატების“ წარმომადგენლები არსებულ ვერსიას მხარს არ უჭერენ და ამბობენ, რომ კანონპროექტი ანტიკონსტიტუციურია.