რას აცხადებს თბილისის მერია „ქართული მანჰეტენის“ პროექტთან დაკავშირებით

პოლიტიკა - 16:39, 26 Jun, 2015

1553

თბილისის მერია ვერეს ხეობაში "ქართული მანჰეტენის" მოწყობის შესახებ გაჟღერებულ ინიციატივას ეხმაურება. დედაქალაქის მთავრობის განცხადებით პროექტის ინიციატორებს თბილისის მერიისთვის აღნიშნული პროექტით ამ დრომდე არ მიუმართავთ:

"დღეს საზოგადოების ერთმა ჯგუფმა გაავრცელა ინიციატივა ვერეს ხეობაში ქართული მანჰეტენის მოწყობის შესახებ. როგორც იდეის ავტორები აცხადებენ, ისინი გეგმავენ ინიციატივით შესაბამის უწყებებს მიმართონ.

მკაფიოდ გვინდა განვაცხადოთ, რომ პროექტის ინიციატორებს დედაქალაქის მერიისთვის არანაირი ინიციატივით ამ დრომდე არ მოუმართავს. შესაბამისად, არ ვიცით, რას წარმოადგენს პროექტი, რომელიც ვერეს ხეობის ქართულ მანჰეტენად ქცევას ითვალისწინებს.

როგორც საზოგადოებისთვის არის ცნობილი, 2015 წლის 13-14 ივნისს მომხდარი სტიქიის სალიკვიდაციო და მდინარე ვერეს ხეობისა და მიმდებარე ტერიტორიის მდგომარეობის შესწავლისა და შემდგომი აღდგენითი სამუშაოების ორგანიზების მიზნით შექმნილი უწყებათაშორისი კომისია აქტიურად მუშაობს, რათა შესაბამისი კვალიფიციური ექსპერტების ჩართულობით შემუშავდეს ვერეს ხეობის შემდგომი განვითარების გეგმა.

აღნიშნული კომისიის მორიგი სხდომა თბილისის მერიაში სწორედ დღეს 20:00 საათზე გაიმართება."- აღნიშნულია მერიის განცხადებაში.