აშშ-ს სახელმწიფო დეპარტამენტის მიერ გამოქვეყნებულ ანგარიშში, რომელიც მსოფლიოს მასშტაბით ადამიანის უფლებების დაცვას ეხება, საუბარი საქართველოში მიმდინარე მოვლენებზეც არის. პრობლემურ საკითხებს შორის ფარული მოსმენებიც მოხვდა.

ანგარიშში ნათქვამია, რომ მარტში არასამთავრობო ორგანიზაციების ჯგუფმა კამპანია „ეს შენ გეხება: ისევ გვისმენენ“ დაიწყო, რომელიც ხელისუფლებისა და სამართალდამცავი ორგანოების მხრიდან თვითნებურ ქმედებებსა და ფარულ მოსმენებზე კონტროლის გაძლიერებას ისახავდა მიზანს. დოკუმენტში აღნიშნულია, რომ 1 მაისს კამპანიამ უარყო პრეზიდენტის ბრალდებები, იმასთან დაკავშირებით, რომ საერთაშორისო ორგანიზაცების ეს პროპაგანდა სახელმწიფოს წინააღმდეგ იყო მიმართული. NGO-ებმა სამართლებრივი უწყებები „უკანონო თვალთვალში“ დაადანაშაულეს.

„6 მაისს ტელეკომპანია "რუსთავი 2"-ის ხელმძღვანელებმა განაცხადეს, რომ მაუწყებელი უკანონო ელექტრონული მოსმენების სამიზნე გახდა. ტელეკომპანიის დირექტორის, ნიკა გვარამის თქმით, შინაგან საქმეთა სამინისტროდან წყარომ მას ვიდეო და აუდიო მასალა მიაწოდა, რომელიც 2013 წლის ივნისშია გადაღებული და სადაც ნაჩვენებია მისი კაბინეტი, მისი მოადგილის ოთახი და "ნიუსრუმის" უფროსის ოთახი. შენობაში სათვალთვალო კამერები ვერ აღმოაჩინეს, თუმცა ნიკა გვარამიამ ჭერში აღმოჩენილი ჭუჭრუთანის შესახებ განაცხადა, სადაც მისი თქმით, სავარაუდოდ კამერები იყო დამონტაჟებული“ - ნათქვამია დოკუმენტში.

როგორც ანგარიშშია აღნიშნული, საქმესთან დაკავშირებით გამოძიება დაიწყო, პროკურატურამ კი განაცხადა, რომ სათვალთვალო შესაძლოა კამერები სახელმწიფო დაცვის სპეციალური სამსახურის თანამშრომლებმა ექსპრეზიდენტ მიხეილ სააკაშვილის ბრძანებით 2012 წელს დაამონტაჟეს, ნიკა გვარამიამ კი პროკურატურის დასკვნის კომენტირებისას განაცხადა, რომ პასუხისმგებელი არა წინა, არამედ მომქედი მთავრობაა.