აშშ-ს სახელმწიფო დეპარტამენტის მიერ გამოქვეყნებულ ანგარიშში, რომელიც მსოფლიოს მასშტაბით ადამიანის უფლებების დაცვას ეხება, საუბარი საქართველოში მიმდინარე მოვლენებზეცაა. ერთ-ერთი საკითხი, რომელზეც ყურადღებაა გამახვილებული დე ფაქტო რესპუბლიკებია.

„აფხაზეთისა და სამხრეთ ოსეთის სეპარატისტული რეგიონების დე ფაქტო მთავრობები ცენტრალური მთავრობის კონტროლს მიღმა რჩებიან. ამ მთავრობებს მხარს უჭერს ათასობით რუსი სამხედრო და სასაზღვრო დაცვა, რომლებიც 2008 წლის რუსეთ-საქართველოს შეიარაღებული კონფლიქტის შემდეგ ე.წ ოკუპირებულ ტერიტორიაზე იმყოფებიან. ცეცხლის შეწყვეტის შეთანხმება აფხაზეთსა და ე.წ სამხრეთ ოსეთში შენარჩუნებულია, თუმცა ძალადობის ფაქტები ორივე რეგიონში გრძელდება. რუსი მესაზღვრეები ადგილობრივ მოსახლეობას გადაადგილების უფლებას უზღუდავენ. აფხაზეთსა და სამხრეთ ოსეთში არსებული ადამიანის უფლებების მხრივ და ჰუმანიტარული ვითარების შესახებ მცირე ოფიციალური ინფორმაცია არსებობს, რადგან რეგიონებში შესვლა შეზღუდულია“- ნათქვამია ანგარიშში

ანგარიშის თანახმად, დე ფაქტო მთავრობები განაგრძობენ ადამიანის უფლებების შეზღუდვას, უმთავრესად ეთნიკურად ქართველი მოსახლეობის მიმართ, რაც ხმის მიცემის უფლებისა და პოლიტიკურ პროცესებში მონაწილეობაში გამოიხატება. ასევე, ქონების ფლობის, ბიზნესის დარეგისტრირებისა და გადაადგილების მხრივ.
სახელმწიფო დეპარტამენტის ანგარიშში ნათქვამია, რომ დე ფაქტო სამხრეთ ოსეთის მთავრობამ უარი უთხრა ეთნიკურად ქართველების უმრავლესობას 2008 წლის ომის შემდეგ სამხრეთ ოსეთში დაბრუნებაზე.

„გარდა "წითელი ჯვრის საერთაშორისო კომიტეტისა" , დე ფაქტო მთავრობა სხვა საერთაშორისო ორგანიზაციებს უფლებას არ აძლევს სამხრეთ ოსეთის ტერიტრორიაზე ჰუმანიტარული დახმარებისთვის რეგულარული შევიდეს. რუსეთის მიერ საქართველოს ოკუპირებული ტერიტორიების ადმინისტრაციული საზღვრის "ბორდერიზაცია" წლის განმავლობაში უფრო ინტენსიური გახდა, რაც ქართველ მოსახლეობას ერთმანეთთან აშორებს და ძირს უთხრის მათ საარსებო წყაროს“ - აღნიშნულია ანგარიშში.