ოჯახური ძალადობა, უმცირესობები და სასამართლო - აშშ-ს სახელმწიფო დეპარტამენტი საქართველოს შესახებ

პოლიტიკა - 11:22, 26 Jun, 2015

1427

აშშ-ს სახელმწიფო დეპარტამენტის მიერ გამოქვეყნებულ ანგარიშში, რომელიც მსოფლიოს მასშტაბით ადამიანის უფლებების დაცვას ეხება, საუბარი საქართველოში მიმდინარე მოვლენებზეცაა.

ანგარიშის მიხედვით საქართველოში გასული წლის განმავლობში ადამიანის უფლებების მხრივ ყველაზე სერიოზული პრობლემები ოჯახური და პოლიტიკურად მოტივირებული ძალადობა, უმცირესობების მიმართ საზოგადოებრივი არატოლერანტობის ზრდა და სიძულვილის ენა და სასამართლო სისტემაში არსებული ხარვეზები იყო, რაც დაუსრულებელ გამოძიებებს და შეუფერებელ წინასწარ დაკავებებს გულისხმობს.

"სხვა პრობლემები, რაც წლის განმავლობაში დაფიქსირდა, იყო სამართალდამცავი უწყებების წარმომადგენელთა მიერ ძალადობა, ციხის არასტანდარტული პირობები, სასამართლოზე პოლიტიკური გავლენის შესახებ ბრალდებები, ბრალდებები შეუფერებელი ელექტრონული თვალთვალის შესახებ, ოპოზიციონერებზე ზეწოლა ადგილობრივი თვითმმართველოს არჩევნების დროს, დევნილების არასტანდარტული საცხოვრებელი პირობები, შშმ პირების უფლებები", - აღნიშნულია აშშ-ის დეპარტამენტის ანგარიშში.

დეპარტამენტის ანგარიშში ასევე საუბარია შრომის ინსპექციაზეც, რომელიც 2013 წელს მიღებული შრომის კოდექსში არსებული მოთხოვნის მიუხედავად ვერ შეიქმნა.

დოკუმენტში პოლიტიუკურ დაკავებებზეც არის მითითება გაკეთებული და ნათქვამია, რომ 2012 წლის შემდეგ მთავრობამ 45 საშუალო და მაღალი დონის ყოფილ მაღალჩინოსანს, მათ შორის მიხეილ სააკაშვილს, ვანო მერაბიშვილს, ბაჩანა ახალაიას ბრალი წაუყენა ისეთ დანაშაულებში, როგორიცააა მართლმსაჯულებისთვის ხელის შეშლა, სახელმწიფო თანხების მითვისება, ფულის გათეთრება, გამოძალვა და ძალაუფლების ბოროტად გამოყენება.