საქართველოსა და სომხეთის იუსტიციის მინისტრებმა ერთობლივი პრესკონფერენცია გამართეს

პოლიტიკა - 15:33, 25 Jun, 2015

1475

საქართველოს იუსტიციის მინისტრმა თეა წულუკიანმა, სასჯელაღსრულებისა და პრობაციის მინისტრმა გიორგი მღებრიშვილმა და სომხეთის იუსტიციის მინისტრმა ჰოვანეს მანუკიანმა სომხურ-ქართული სამართლებრივი ფორუმის დასრულების შემდეგ ერევანში დღეს ადგილობრივი მედიის წარმომადგენელთათვის ერთობლივი პრესკონფერენცია გამართეს.

პრესკონფერენციაზე მინისტრებმა თავიანთ სფეროში არსებულ მიღწევებზე, რეფორმებზე ისაუბრეს და ჟურნალისტების კითხვებს უპასუხეს. საქართველოს იუსტიციის მინისტრის განცხადებით, ისტორიულია ეს დღე, რადგან უმნიშვნელოვანეს ფორუმს ჩაეყარა საფუძველი, სადაც ქვეყნები ერთმანეთს გამოცდილებას გაუზიარებენ და იმუშავებენ სამხრეთ კავკასიის რეგიონის წარმატებისთვის.

„ჩვენ ვცხოვრობთ ურთულეს რეგიონში და ჩვენი ერთადერთი იარაღი მხოლოდ ძლიერი დემოკრატიაა, სადაც დემოკრატიული ინსტიტუტები ადამიანის უფლებების დაცვისა და განმტკიცებისათვის მუშაობენ. მხოლოდ დამოუკიდებელ, ძლიერ მოქალაქეებს შეუძლიათ, წინ აღუდგნენ იმ მრავალ გამოწვევას, რაც ჩვენს ქვეყნებს აქვთ“, − განაცხადა თეა წულუკიანმა.

მანვე ისაუბრა იმ სამართლებრივი რეფორმების შესახებ, რომელთაც საქართველოს იუსტიციის სამინისტრო უდგას სათავეში.

ერევანში სომხეთ-საქართველოს სამართლებრივი თანამშრომლობის ფორუმი დღეს გაიხსნა.

იუსტიციის მინისტრი სამინისტროს დელეგაციას ხელმძღვანელობს, რომლის შემადგენლობაში არიან: მინისტრის პირველი მოადგილე ალექსანდრე ბარამიძე, მოადგილე ალექსანდრე ტაბატაძე, სამინისტროს დეპარატმენტებისა და საჯარო სამართლის იურიდიული პირების ხელმძღვანელები, პარლამენტის წევრები სამველ პეტროსიანი და რუსლან პოღოსიანი, აგრეთვე, გაზეთ „ვრასტანის“ მთავარი რედაქტორი ვან ბაიბურთი.

ფორუმის ფარგლებში რამდენიმე სესია იმუშავებს. პირველ თემატურ სესიაზე სერვისების ხელმისაწვდომობას, ინფორმაციის თავისუფლებას, ელექტრონულ მმართველობასა და კორუფციის წინააღმდეგ საკანონმდებლო და ინსტიტუციურ მექანიზმებს განიხილავენ. მეორე სესიის თემა საქართველოში არასრულწლოვანთა მართლმსაჯულების რეფორმა იქნება. საუბარი შეეხება პენიტენციარულ სფეროს, დანაშაულის პრევენციას და პატიმართა რესოციალიზაცია-რეაბილიტაციას. კიდევ ერთი სფერო, რომელსაც სესია მიეძღვნება, „ღია მმართველობის პარტნიორობასთან“ დაკავშირებული საკითხებია. გარდა ამისა, საქართველოს იუსტიციის სამინისტროს დელეგაციის წევრები ფორუმის მონაწილეებს იუსტიციის სახლებისა და საზოგადოებრივი ცენტრების კონცეფციასაც გააცნობენ.