შეიარაღებული ძალების გენერალური შტაბის ხელმძღვანელი ვახტანგ კაპანაძე „ისლამური სახელმწიფოს“ მიერ კავკასიის ტერიტორიაზე საკუთარი პროვინციის დაარსების შესახებ გავრცელებულ ინფორმაციას ეხმაურება.

მისი თქმით, მსგავსი ქმედებები საქართველოსგან უყურადღებოდ არ დარჩება.

„აღნიშნული ორგანიზაცია არის საფრთხე როგორც საქართველოსთვის, ისე მსოფლიოსთვის. ჩვენ, როგორც მთელი მსოფლიოს შემადგენელი ნაწილი "ისლამურ სახელმწიფოს" საფრთხედ განვიხილავთ. არსებობს შესაბამისი ორგანოები, მათ შორის შეიარაღებული ძალები თავისი წილი პასუხისმგებლობიდან გამომდინარე, რომლებიც ამუშავებენ სცენარებსა და გათვლებს. "ისლამური სახელმწიფოს" მოქმედებები უყურადღებოდ არ რჩება", - განაცხადა კაპანაძემ.

უცხოური მედიის ინფორმაციით, ”ისლამური სახელმწიფოს” მებრძოლები ჩრდილოეთ კავკასიის ტერიტორიაზე ახალი პროვინციის (ვილაიეთის) შექმნის შესახებ იუწყებიან. ამ განცხადებით ტერორისტული ორგანიზაციის ერთ-ერთი ლიდრი აბუ მუჰამედ ალ-ადნანი გამოვიდა, რომელიც თვითგამოცხადებული ხალიფას აბუ ბაქრ ალ-ბაგდადის პრეს-მდივნის ფუნქციას ასრულებს.