საქართველოს მოქალაქეები არგენტინაში წასვლას უვიზოდ შეძლებენ

პოლიტიკა - 18:10, 24 Jun, 2015

2660

არგენტინასა და საქართველოს შორის ხელი მოეწერა შეთანხმებას უვიზო მიმოსვლის შესახებ.არგენტინაში საქართველოს საგარეო საქმეთა მინისტრის ვიზიტის ფარგლებში, ხელი მოეწერა შეთანხმებას "საქართველოს მთავრობასა და არგენტინის რესპუბლიკის მთავრობას შორის ორდინალური პასპორტების მფლობელთათვის უვიზო მიმოსვლის შესახებ“.
შეთანხმებას ხელი მოაწერეს საქართველოს საგარეო საქმეთა მინისტრმა, თამარ ბერუჩაშვილმა და არგენტინის რესპუბლიკის საგარეო საქმეთა და კულტთა მინისტრმა, ექტორ ტიმერმანმა. დოკუმენტი ძალაში შევა ორივე მხარის მიერ შესაბამისი შიდასახელწიფოებრივი პროცედურების დასრულებიდან ერთ თვეში. არგენტინის საგარეო საქმეთა სამინისტროში გამართულ შეხვედრაზე მხარეებმა ასევე მიმოიხილეს ორმხრივი თანამშრომლობის აქტუალური საკითხები. ერთხმად აღინიშნა, რომ ქვეყნებს შორის უვიზო მიმოსვლა ხელს შეუწყობს ტურისტული, კულტურული და ეკონომიკური კავშირების გააქტიურებას და განაპირობებს ორივე ქვეყნის ცნობადობის გაზრდას შესაბამის რეგიონებში.
ვიზიტის ფარგლებში ასევე ხელი მოეწერა კულტურის სფეროში თანამშრომლობის, საბაჟო სფეროში ადმინისტრაციული ურთიერთდახმარების შესახებ შეთანხმებებს; მემორანდუმს საქართველოსა და არგენტინის რესპუბლიკას შორის ეკონომიკური დასავაჭრო თანამშრომლობის შესახებ და ურთიერთგაგების მემორანდუმს საქართველოსა და არგენტინის რესპუბლიკის კომპეტენტურ უწყებებს შორის საგადასახადო მიზნებისათვის ინფორმაციის ავტომატური გაცვლის შესახებ. აღნიშნული შეთანხმებების იმპლემენტაცია განაპირობებს საქართველოსა და არგენტინას შორის თანამშრომლობის შემდგომ განვითარებას და ხელს შეუწყობს ხალხთაშორისი კავშირების გაღრმავებას. გაიმართა ასევე გადასახადების ფედერალურ ადმინისტრაციაში (AFIP) საბაჟო და საგადასახადო სფეროებში თანამშრომლობის შეთანხმებების ხელმოწერის ცერემონია. არგენტინის მხრიდან ხელი მოაწერა საჯარო შემოსავლების ფედერალურმა ადმინისტრატორმა რიკარდო ეჩეგარაიმ.