პრეზიდენტის მრჩეველი ეკონომიკის საკითხებში გიორგი აბაშიშვილი ეროვნული ბანკიდან საზედამხედველო ფუნქციის გამოყოფას ეხმაურება და ამბობს, რომ აღნიშნული ცვლილება გიორგი ქადაგიძის წინააღმდეგ არის მიმართული.

საგანგებო განცხადება პრეზიდენტის ადმინისტრაციაში ცოტა ხნის წინ გაკეთდა.

აბაშიშვილი მიიჩნევს, რომ პიროვნებების გამო ინსტიტუტების ნგრევის პროცესი დაუშვებელია და აღნიშნული ცვლილების ძალაში შესვლა საფრთხეს შეუქმნის ქვეყნის მაკროეკონომიკურ სტაბილურობას, შედეგებზე პასუხისმგებლობა კი მის მხარდამჭერებს დაეკისრებათ.

„დღეიდან მე ვიწყებ კონსულტაციებს აღნიშნულ საკითხთან დაკავშირებით საერთაშორისო-საფინანსო ინსტიტუტებთან, არასამთავრობო ორგანიზაციებთან, დარგის ექსპერტებთან, საბანკო სფეროს წარმომადგენლებთან, პარლამენტთან, ეკონომიკური პროფილის სამინისტრეობთან და ეროვნულ ბანკთან. ამავდროულად მოგახსენებთ, რომ ამჟამად ქვეყანაში მიმდინარეობს ეროვნული ბანკის უარგუმენტო დანაწევრების პროცესი. საუბარია იმ ინსტიტუზე, რომელიც ყველა საერთაშიროს ორგანიზაციის შეფასებით მაღალპროფესიულად ასრულებს საკუთარ მოვალეობას, მათ შორის საბანკო ზედამხედველობის სფეროში. ამავდროულად საუბარია ისეთი ტიპის ცვლილებებზე, რომელიც ევროკავშირთან ასოცირების დღის წესრიგთან ასევე საქართველოს მთავრობის განკარგულებათან, რომელიც ასოცირების დღის წესრიგის სამოქმედო გეგმას შეეხება. სამწუხაროდ, ამ დრომდე კანონპროექტის არც ავტორების და არც მხარდამჭერების მხრიდან მცირე არგუმენტიც კი არ იქნა წარმოდგენილი, თუ რატომ უნდა მოხდეს ეს ცვლილება, გარდა იმისა, რომ ბატონი ქადაგიძე არის მიუღებელი და საჭიროა მისი ნეიტრალიზაცია. პირველ რიგში უნდა აღინიშნოს, რომ დაუშვებლად მიგვაჩნია პიროვნებების გამო ინსტიტუტების ნგრევის პროცესი, რომელსაც ახლა აქვს ადგილი და მეორე, სწორედ ახლა დავიწყეთ ქადაგიძის ადგილმონაცვლის შერჩევის პროცესი. სულ 7 თვე დარჩა ბატონ ქადაგიძეს. შესაბამისად, კიდევ უფრო დამაფიქრებელი და შემაშფოთებელია, თუ მთლიანობაში ამ პროცესის განხორციელების შემთხვევაში რასთან გვაქვს საქმე. აღნიშნული ცვლილების ძალაში შესვლა საფრთხეს უქმნის ქვეყნის მაკროეკონომიკურ სტაბილურობას. ცვლილებებით გამოწვეულ შედეგებზე მის მხარდამჭერებს ეკისრებათ პასუხისმგებლობა“, - განაცხადა აბაშიშვილმა.