საკრებულოს ფრაქცია „ნაციოანლური მოძრაობის“ თავმჯდომარე ირაკლი აბესაძე სიცრუეს უწოდებს გავრცელებულ ინფორმაციას, თითქოს ვერეს ხეობაში გზის გაყვანის დროს გეოლოგიური დასკვნა არ არსებობდა.

ამის შესახებ აბესაძემ ჟურნალისტებთან საუბრისას განაცხადა.

„არ შეესაბამება სიმართლეს ის ინფორმაცია, რომ გზის გაყვანის დროს გეოლოგიური დასკვნა არ არსებობდა. თავად საინჟინრო კონსტრუქციის ხასიათიდან გამომდინარე შესაბამისი ნიადაგის შესწავლის და გეოლოგიური დასკვნის გარეშე ამ კონსტრუქციების აგება შეუძლებელიც კი იქნებოდა. ეს ემსახურება საზოგადოების შეცდომაში შეყვანას“, - ამბობს ირაკლი აბესაძე.

შეგახსენებთ, სტიქიიდან მეორე დღეს თბილისის პროკურატურამ გამოძიება დაიწყო სამშენებლო სამუშაოების წარმოებისას უსაფრთხოების წესების შესაძლო დარღვევის ფაქტზე, რასაც ადამიანების სიცოცხლის მოსპობა და სხვა მძიმე შედეგი მოჰყვა. გამოძიება შეისწავლის, მდინარე ვერეს ხეობაში სამშენებლო სამუშაოების დაწყებამდე გამოიკვლიეს თუ არა ადგილმდებარეობა, გაითვალისწინეს თუ არა მოსალოდნელი რისკები და დაიცვეს თუ არა უსაფრთხოების ნორმები მშენებლობისას. პროკურატურამ თბილისის მერიის კეთილმოწყობის სამსახურიდან ვაკე-საბურთალოს ახალ გზასთან დაკავშირებული დოკუმენტაცია გამოითხოვა