სად გაქრა გეოლოგიური დასკვნა და რა დოკუმენტაცია გაიტანა პროკურატურამ მერიის კეთილმოწყობის სამსახურიდან

პოლიტიკა - 20:18, 22 Jun, 2015

1778

სტიქიიდან მეორე დღეს თბილისის პროკურატურამ გამოძიება დაიწყო სამშენებლო სამუშაოების წარმოებისას უსაფრთხოების წესების შესაძლო დარღვევის ფაქტზე, რასაც ადამიანების სიცოცხლის მოსპობა და სხვა მძიმე შედეგი მოჰყვა. გამოძიება შეისწავლის, მდინარე ვერეს ხეობაში სამშენებლო სამუშაოების დაწყებამდე გამოიკვლიეს თუ არა ადგილმდებარეობა, გაითვალისწინეს თუ არა მოსალოდნელი რისკები და დაიცვეს თუ არა უსაფრთხოების ნორმები მშენებლობისას. პროკურატურამ თბილისის მერიის კეთილმოწყობის სამსახურიდან ვაკე-საბურთალოს ახალ გზასთან დაკავშირებული დოკუმენტაცია გამოითხოვა - ამის შეასახებ ,,კვირის პალიტრა“ წერს. საინტერესოა, რომ დოკუმენტაციაში პროექტის გეოლოგიური დასკვნა არ აღმოჩნდა. ,,ის დოკუმენტების ნუსხაში ფიგურირებს, თუმცა, კეთილმოწყობის სამსახურის არქივში არ არის. შესაძლოა, დასკვნა პროექტის შემსრულებელ კომპანიას ჰქონდეს ან საერთოდ არც არსებობდეს“ - წერს გამოცემა.

საუბარია ე.წ. ახალი გზის სხვა პროექტებზე და ტენდერებზე, რომელიც თბილისის მერიამ ჩაატარა.

თბილისის საკრებულოს ქონების მართვისა და საფინანსო-საბიუჯეტო კომისიის თავმჯდომარე ჯაბა სამუშია ამბობს, რომ დოკუმენტაციაში,რომელიც ვაკე-საბურთალოს ახალი გზის მშენებლობას ეხება, რამდენიმე უცნაური გარემოება აღმოჩნდა. ,,მაგალითად, მანამდე გზა ფიზიკურად არ არსებობდა, დოკუმენტებში კი სამუშაო გატარებულია, როგორც არსებული გზის რეაბილიტაცია და არა ახალი გზის მშენებლობა“ - აცხადებს სამუშია.

მისივე თქმით, ვაკე-საბურთალოს ჩქაროსნული მაგისტრალის მშენებლობაზე თავისი კომპეტენტური აზრი და დასკვნა არ წარმოუდგენია თბილისის არქიტექტურის სამსახურს, ტრანსპორტის საქალაქო სამსახურსა და ზონალურ საბჭოსაც. სამუშია თვლის, რომ ეს სავალდებულო იყო, რადგან მშენებლობა სარეკრეაციო ზონაში მიმდინარეობდა. ,,არც ერთ ამ უწყებაში პროექტი განსახილველად არ შესულა, რადგან "გზის რეაბილიტაცია" ამას არ საჭიროებდა“-აცხადებს ჯაბა სამუშია.

მერიის კეთილმოწყობის სამსახურის უფროსს არ აქვს ინფორმაცია რა დოკუმენტაცია გაიტანა მერიიდან პროკურატურამ. ავთანდილ სუდაძე აცხადებს, რომ მისი ინტერესის სფეროში ეს არ შედიოდა განსაკუთრებით სტიქიის პერიოდში.

"კურიერი" დღესვე თბილისის მერიის არქიტექტურული სამსახურის პოზიციით დაინტერესდა. სამსახურში ამბობენ, რომ თავად გეოლოგიური დასკვნა ნაპოვნი არ არის, თუმცა მიღება- ჩაბარების აქტის ჩამონათვალში გეოლოგიური დასკვნა წერია და შესაბამისად პროკურატურამ ეს მასალები გაიტანა.