უეფა-ს სუპერთასის ფინალის ბილეთების გაყიდვის შეფერხებასთან დაკავშირებით ფეხბურთის ფედერაციასთან აქცია სოციალურ ქსელში დაიგეგმა.

"მოვითხოვთ უეფას სუპერთასის ბილეთების გაყიდვას სამართლიან პირობებში!!! არა გადამყიდველებს!!! არა კორუმპირებულ ფეხბურთის ფედერაციას!!! არა უნიათო Biletebi.ge-ს!!!!. თუ www.biletebi.ge -ს მდგომარეობა საღამომდე უცვლელი დარჩა, საქართველოს ფეხბურთის ფედერაციასთან ვაწყობთ საპროტესტო აქციას და ვითხოვთ პასუხს ამ უპასუხისმგებლო დამოკიდებულებისა და საქციელის გამო", - ნათქვამია აქციის ორგანიზატორთა განცხადებაში. აქცია 18:00 საათზეა დაანონსებული.

უეფა-ს სუპერთასის ფინალზე დასასწრები ბილეთების გაყიდვა დღეს დილის 09:00 საათიდან შეჩერებულია. biletebi.ge-ს ადმინისტრაციის ინფორმაციით, საიტზე მოხდა კიბერშეტევა. ადმინისტრაციის განცხადებით, პრობლემების აღმოფხვრაზე მუშაობენ და ეცდებიან საიტი მალე ჩაირთოს.