ირაკლი ვაჭარაძის დახმარება არქიმანდრიტ ანთიმოზს - "იმედი მაქვს სამკურნალო თანხა შეუგროვდება"

სოც.მედია - 18:17, 19 Jun, 2015

5787

არქიმანდრიტი ანთიმოზ ბიჩინაშვილის მიერ სოციალურ ქსელში გამოქვეყნებულ თხოვნას ჯანმრთელობის პრობლემების მოსაგვარებლად ფინანსური დახმარების შესახებ, ჟურნალ „17 მაისის“ რედაქტორი ირაკლი ვაჭარაძე გამოეხმაურა. ვაჭარაძემ ანთიმოზ ბიჩინაშვილის ანგარიშზე 200 ლარი გადარიცხა და შესაბამისი ქვითარი სოციალურ ქსელში გამოაქვეყნა, აღნიშნული ქმედების მიზეზად კი სხვებისთვის მაგალითის მიცემა დაასახელა. ლგბტ თემის უფლებების დამცველის ქველმოქმედებას არქიმანდრიტიც გამოეხმაურა და ირაკლი ვაჭარაძეს მადლობა სოციალური ქსელში გადაუხადა და ლოცვებში მოხსენიებასაც დაპირდა.

შეგახსენებთ, 2013 წლის 17 მაისის მოვლენების დროს ირაკლი ვაჭარაძე ორგანიზაცია „იდენტობას“ ხელმძღვანელი იყო, აღნიშნული ორგანიზაცია რუსთაველის გამზირზე ჰომოფობიისა და ტრანსფობიის წინაარმდეგ ბრძოლის საერთაშორისო დღის აღნიშვნას ორგანიზატორობდა. ანთიმოზ ბიჩინაშვილი კი იმ ადამიანების გუნდში იყო, რომლებიც აღნიშნული დღის აღნიშვნას კატეგორიულად ეწინააღმდეგებოდნენ. სასულიერო პირების და მათი მრევლის მხრიდან ფიზიკური წინააღმდეგობის გაწევის და აქციის სამართალდამცავების მხრიდან აქციის მონაწილეების არასათანადოდ დაცვის გამო 2013 წლის 17 მაისს „იდენტობამ“ ჰომოფობიისა და ტრანსფობიის წინააღმდეგ ბრძოლის საერთაშორისო დღის აღნიშვნა ვერ შეძლო.