ხალხს უფლება აქვს იცოდეს, არის თუ არა დაცული - შაშკინი საფრანგეთში გაფორმებულ ხელშელშეკრულებაზე

პოლიტიკა - 17:58, 16 Jun, 2015

1690

თავდაცვის მინისტრ თინა ხიდაშელის მიერ საფრანგეთში გაფორმებულ ხელშეკრულებას „ნიუპოსტთან“ თავდაცვის ყოფილი მინისტრი დიმიტრი შაშკინი გამოეხმაურა. როგორც შაშკინმა „ნიუპოსტს“ განუცხადა, ხელისუფლებამ საზოგადოებას უნდა მიაწოდოს ინფორმაცია, თუ რა სახის ხელშეკრულება გაფორმდა ორ ქვეყანას შორის, რადგან საზოგადოებას აქვს უფლება იცოდეს, არის თუ არა ქვეყანა დაცული.

დიმიტრი შაშკინის თქმით, როდესაც წინა ხელისუფლების დროს საქართველოსა და აშშ-ს შორის თავდაცვითი იარაღის მიწოდების შეთანხმება მოდა, ხელისუფლებამ ამის შესახებ საზოგადოებას ინფორმაცია მიაწოდა.

"სამწუხაროდ საქართველოს მოსახლეობისთვის უცნობია, თუ რა ხელშეკრულებაზე მოაწერა ხელი თავდაცვის მინისტრმა თინა ხიდაშელმა. ბუნებრივი და გასაგებია, რომ არსებობს სახელმწიფო საიდუმლოს ცნება, მაგრამ ეს თემა იმდენად მნიშვნელოვანია, რომ საზოგადოებას უნდა მიეწოდოს ინფორმაცია, თუ რაზეა საუბარი.

2012 წლის დასაწყისში საქართველოს პრეზიდენტ მიხეილ სააკაშვილსა და აშს-ს პრეზიდენტ ბარაკ ობამას შორის მოხდა შეთანხმება, რომ აშშ-ს უნდა მიეწოდებინა საქართველოსთვის ანტისაჰაერო თავდაცვითი იარაღი. შემდგომში ეს შეთანხმება დადასტურდა ჰილარი კლინტონის თბილიში ვიზიტის დროს. ჩვენც გვესმოდა სახელმწიფო საიდუმლოს ცნება, მაგრამ გვესმოდა ისიც თუ რამდენად მნიშვნელოვანია საზოგადოებისთვის იმის ცოდნა, რომ ქვეყანა არის დაცული.

რთულია ამ საკითხზე საუბრაი, რადგან არ არსებობს არავითარი ინფორმაცია, თუ რა დოკუმენტს მოეწერა ხელი და რას მიიღებს საქართველო, ეს იქნება დახმარება, თუ საქართველოს შეიარაღების ყიდვა მოუწევს, ეს ყველასთვის არის უცნობი და ჩემი აზრით საჭიროა საზოგადოებისთვის გარკვეული ინფორმაციის მიწოდება მაინც. საზოგადოებას აქვს უფლება იცოდეს, არის თუ არა ქვეყანა დაცული.

გასათვალისწინებელია ისიც, რომ ქვეყნებს შორის ერთმანეთისთვის იარაღის მიწოდება დაფარული არ არის და ეს ღია პროცესია. თუ ვინმეს ჰგონია, რომ რუსეთს არ ეცოდინება რა სახის შეიარაღებას მიიღებს საქართველო ძალიან ცდება. გამოდის რომ ინფორაციას ჩვენ მხოლოდ ჩვენს საზოგადოებას ვუმალავთ,"-განაცხადა დიმიტრი შაშკინმა.