საქართველოს პრემიერ მინისტრმა ირაკლი ღარიბაშვილმა სტიქიის შედეგების ლიკვიდაციის და დაზარალებულების შესახებ საქართველოს მთავრობის წევრების ანგარიში მოისმინა. პრემიერის თქმით მთავრობა ვითარებას სრულად აკონტროლებს. მისი თქმით დედაქალაქში კვლავაც რჩება რთული წერტილები, რომელთა შორის ყველაზე მძიმე სიტუაცია კვლავ სვანიძის ქუჩაზეა.

„ჯერჯერობით უგზო-უკვლოდ დაკარგულად ითვლება 11 მოქალაქე, რაც შეეხება დაშავებულებს, ამ დროისთვის საავადმყოფოებში რჩება 7 ადამიანი, ყველა მდგომარეობა არის სტაბილური, მთელი ქალაქის მასშტაბით მიმდინარეობს სალიკვიდაციო სამუშაოები. ხვალ დილისთვის გზის აღდგენა იგეგმება. იწმინდება ვერეს ხეობა და ზოოპარკის ტერიტორია. მელიქიშვილის გამზირის დაზიანებული მონაკვეთი აღდგენილია და რამდენიმე საათში გზა გაიხსნება,“ - განცხადა ირაკლი ღარიბაშვილმა.

პრემიერმა ზოოპარკის შესახებაც ისაუბრა და განაცხადა, რომ ზოოპარკის ადმინისტრაციის მტკიცებით არცერთი მტაცებელი ცხოველი ზოოპარკის ტერიტორიის გარეთ არ იმყოფება.

პრემიერმა მადლობა გადაუხადა ყველა იმ სამსახურების წარმომადგენლებს ვინც აქტიურად არის ჩართული სამაშველო სამუშაოებში, ასევე პრემიერის განსაკუთრებული მადლობა მოხალისეებმა მიიღეს. ირაკლი ღარიბაშვილმა მადლობა გადაუხადა თბილისელებსაც, რომლებმაც მანქანებით გადაადგილებაზე მთავრობის თხოვნა გაითვალისწინა.